ក្រុមប្រឹក្សាឃ្លាំមើលកម្ពុជាបង្ហាញក្តីបារម្ភថា ចំនួនប្រជាជនចិនកើនឡើងច្រើនក្នុងរយៈពេលខ្លី អាចនឹងមានវិបត្តិនៅក្នុងសង្គមនៅក្នុងអនាគត។
សេចក្តីថ្លែងការណ៍របស់ក្រុមប្រឹក្សាឃ្លាំមើលកម្ពុជាចេញផ្សាយនៅថ្ងៃនេះ លើកឡើងថា ក្នុងរយៈពេលពីរឆ្នាំចុងក្រោយនេះ ចំនួនជនជាតិចិនកើនឡើងច្រើន។ សេចក្តីថ្លែងការណ៍បន្តថា ស្របពេលកំណើនជនជាតិចិនកើនឡើងច្រើន ហើយច្បាប់កម្ពុជាធូររលុងនោះ នឹងកើតវិបត្តិនៅក្នុងសង្គមខ្មែរមិនខាន។
តាមរបាយការណ៍របស់ក្រសួងមហាផ្ទៃចេញផ្សាយកាលពីខែកញ្ញា ឆ្នាំ២០១៨ បង្ហាញថា ជនជាតិចិននៅកម្ពុជាមានជំនួន២១ម៉ឺននាក់ ។
កាលពីថ្ងៃទី២៤ ខែតុលា ឆ្នាំ២០១៨ ពេលជួបជាមួយពលរដ្ឋខ្មែរនៅក្នុងប្រទេសស្វីស លោក នាយករដ្ឋមន្ត្រី ហ៊ុន សែន ថ្លែងថា ចំនួនប្រជាជនចិននៅកម្ពុជាមិនមានគួរឲ្យព្រួយបារម្ភនោះទេ។ លោកថា ជនជាតិចិនទាំងនោះមកធ្វើការងារ ហើយថា ពេលចប់ការងារ ពួកគេនឹងវិលត្រឡប់ទៅប្រទេសកំណើតវិញ។
