លោកនាយករដ្ឋមន្ត្រី ហ៊ុន សែន ព្រមានថា នឹងវាយខ្នោះ លោក សម រង្ស៊ី បើអតីតមេដឹកនាំបក្សប្រឆាំងរូបនេះហ៊ានចូលស្រុកវិញដូចការអះអាង តែបានបង្ហើបឲ្យលោក កឹម សុខា សុំសិទ្ធិធ្វើនយោបាយឡើងវិញ ខណៈច្បាប់បើកច្រកឲ្យគណបក្សប្រឆាំងធ្វើនយោបាយឡើងវិញជិតចូលជាធរមាន។
លោក ហ៊ុន សែន ក្នុងពិធីសំណេះសំណាលជាមួយកម្មករនៅខេត្តកណ្តាលថ្ងៃពុធនេះ បានថ្លែងដោយមិនបញ្ចេញឈ្មោះ តែទំនងជាសំដៅទៅលោក សម រង្ស៊ី ថា គេបានប្រកាសថា គេនឹងចូលមកកម្ពុជាវិញឆាប់ៗ។ លោកថា លោកក៏ត្រៀមខ្នោះរួចរាល់ហើយ សម្រាប់ទទួលដើម្បីទូទាត់បញ្ជី។
លោកថា៖«សុំប្រាប់ទៀតថា ព្រលានយន្តហោះមាន៣សម្រាប់ចុះចត ១ ទីក្រុងភ្នំពេញ ២ សៀមរាប ៣ ក្រុងព្រះសីហនុ អាចចុះចតបានទៅតាមបំណងរបស់អ្នកជិះ តែខ្នោះក៏វាទៅតាមទីកន្លែងនេះដែរ ហើយបើដាក់ខ្នោះ ដាក់តាមស្ទីលអាមេរិកកាំងម៉ង។ ហើយស្ទីលអាមេរិកកាំងអត់មានដាក់ទៅមុខទេ ដាក់ទៅក្រោយ អាហ្នឹងសុំបញ្ជាក់ មានតែប៉ុណ្ណឹងទេ»។
លោក ហ៊ុន សែន ថ្លែងទៀតថា ច្បាប់បើកផ្លូវឲ្យអ្នកនយោបាយដែលតុលាការហាមឃាត់ ឲ្យធ្វើនយោបាយឡើងវិញនោះ បានឆ្លងផុតពីដៃព្រឹទ្ធសភាហើយ។ លោកបានដាក់ជាសំនួរ ទំនងជាសំដៅទៅដៃគូនយោបាយរបស់លោក សម រង្ស៊ី គឺលោក កឹម សុខា ថាការនៅបន្តរក្សាមិត្តភាពជាដៃគូ និងបាត់ឱកាសធ្វើនយោយគួរជ្រើសរើសយកមួយណា ។
លោកថា៖ «បើវាមិនសុំសិទ្ធិ[ធ្វើនយោបាយ]ទេ វាអត់មានសិទ្ធិទៅជួបជុំទេ។ កុំភាន់ច្រឡំ រើសទៅ ឬមួយអ្នកឯងចង់ឈ្នះតាមរយៈសាមគ្គីភាពរបស់អ្នកឯង ក៏ប៉ុន្តែអ្នកឯងក៏អត់មានលទ្ធភាពចូលរួមបោះឆ្នោតឆ្នាំ២០២២ដែរ ធ្វើទៅ រើសទៅ!»។
មេធាវីមួយរូបដែលការពារក្តីឲ្យលោក កឹម សុខា គឺលោក ផែង ហេង មានប្រសាសន៍ថា មកដល់ពេលនេះកូនក្តីលោកមិនទាន់ប្រាប់ពីជំហរថានឹងសុំសិទ្ធិធ្វើនយោបាយឡើងវិញឬយ៉ាងណានៅឡើយទេ ខណៈ មេដឹកនាំបក្សកាន់អំណាច អះអាងថា ការបើកផ្លូវឲ្យធ្វើនយោបាយឡើងវិញនេះ ត្រូវធ្វើជាលក្ខខណៈបុគ្គលដាច់ដោយលែកពីគ្នា មិនធ្វើជាកញ្ចប់នោះ។
អតីតអ្នកតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន ហៅសារនយោបាយនេះថា មិនមានអ្វីថ្មីទេ ដើម្បីយកប្រៀបលើគណបក្សប្រឆាំង។
លោកថា៖ «ជាយុទ្ធសាស្ត្រ បើគណបក្សប្រឆាំងបែកបាក់ អាហ្នឹងជារឿងមួយ ដែលគណបក្សកាន់អំណាច ទទួលបានជោគជ័យទៀតហើយ។ ហើយរឿងឯកឧត្តម សម រង្ស៊ី ក៏អញ្ចឹងដែរខ្ញុំឃើញវាយប្រហារគ្នាដោយពាក្យសម្តីទៅវិញទៅមក រវាងឯកឧត្តម សម រង្ស៊ី និងសម្តេចនាយករដ្ឋមន្ត្រីហ្នឹង វាច្រើនលើកច្រើនសារហើយ វាទៅជារឿងដដែលៗ ហើយវាបង្កឲ្យមានបញ្ហាក្តៅ ត្រជាក់ៗ ទៅតាមចរិតអ្នកនយោបាយហ្នឹង»។
មន្ត្រីរូបនេះ អះអាងថា អ្វីដែលជាដំណោះស្រាយ បក្សកាន់អំណាចត្រូវបើកផ្លូវឲ្យគណបក្សសង្គ្រោះជាតិបានដំណើរការឡើងវិញ ហើយការបើកផ្លូវត្រូវធ្វើឡើងជាកញ្ចប់ សងតំណែងក្រុមប្រឹក្សាឃុំ សង្កាត់មកវិញ និងបោះឆ្នោតព្រឹទ្ធសភាឡើងវិញជាដើម ទើបកម្ពុជាគេចផុតពីវិធានការនានារបស់សហគមន៍អន្តរជាតិ។ ប៉ុន្តែលោក ហ៊ុន សែន បានព្រមានទុកថា កុំសង្ឃឹមថា សម្ពាធអន្តរជាតិ អាចសម្លាប់រដ្ឋាភិបាលបាននោះ។
អ្នកវិភាគនយោបាយលោក ឯម សុវណ្ណារ៉ា បានប្រាប់ VOD កាលពីសប្តាហ៍មុនថា ជម្លោះនយោបាយនៅកម្ពុជា មិនអាចឈានទៅផ្សះផ្សារ ឬបង្រួបបង្រួមជាតិឡើងវិញ តាមរយៈខ្មែរនិងខ្មែរបានទេ ដោយថាអ្នកនយោបាយខ្មែរពេលនេះ មិនបានបើកចំហរបេះដូង ដើម្បីទទួលយកយោបល់ របស់ដៃគូប្រកួតមកពិចារណាទេ ដរាបណាគ្មានសម្ពាធពីបរទេស ដែលលោកថា ពិសេសសហរដ្ឋអាមេរិក និងសហភាពអឺរ៉ុបនោះ។