ក្រុមកម្មករជាង ១២០០នាក់ បម្រើការនៅរោងចក្រមួយស្ថិតនៅជាយរាជធានីភ្នំពេញ បានផ្ទុះការតវ៉ាទៀតនៅព្រឹកថ្ងៃនេះ ដើម្បីទាមទារប្រាក់អតីតភាពការងារ និងប្រាក់បំណាច់ឆ្នាំរបស់ពួកគេ។
កម្មករអះអាងថា ពួកគេ ១២០០នាក់ បម្រើការងារនៅរោងចក្រ សេឌូណូ អ៊ិនវេសមេន ស្ថិតក្នុងនៅភូមិខ្វានៅក្នុងខណ្ឌដង្កោរ បានប្រមូលផ្ដុំគ្នាតវ៉ានៅមុខរោងចក្រនោះរយៈពេល២ថ្ងៃហើយ ដើម្បីទាមទារឲ្យថៅកែរោងចក្រជាជនជាតិចិនបើកប្រាក់អតីតភាពការងារ និងប្រាក់បំណាច់ឆ្នាំរបស់ពួកគេ។
កម្មករម្នាក់អ្នកស្រី ឈួន ស្រីតូច ដែលអះអាងថា បម្រើការងារនៅរោងចក្រ សេឌូណូ ៧ឆ្នាំមកហើយនោះ បានប្រាប់វីអូឌីកន្លែងតវ៉ាថា កម្មករខ្លះ បានបម្រើការងារនៅរោងចក្រ សេឌូណូ ចន្លោះពី ៣ ទៅ ៧ឆ្នាំហើយ ដោយថៅកែមិនដែលទូទាត់ប្រាក់អតីតភាពការងារជូនពួកគេឡើយ។
អ្នកស្រីបន្ថែថា៖ «ពួកខ្ញុំចង់ឲ្យថៅកែគាត់គុណផ្តាច់ឲ្យពួកខ្ញុំតែម្តងចាប់ពីឆ្នាំ២០១១ ដល់ឆ្នាំ២០១៩នេះ ហើយចាប់ពីខែ១ ឆ្នាំ២០១៩ហ្នឹង គាត់ចង់ទូទាត់ឲ្យពួកខ្ញុំ ៦ខែម្តង នោះជារឿងរបស់ក្រុមហ៊ុនទេ ប៉ុន្តែ គ្រាន់តែចង់ឲ្យក្រសួង និងក្រុមហ៊ុនហ្នឹង គុណប្រាក់អតីតភាពឆ្នាំចាស់ឲ្យពួកខ្ញុំធ្វើចាស់ៗហ្នឹង ឲ្យអស់ អ្នកធ្វើ ៣ឆ្នាំ ៥ឆ្នាំ ៦ឆ្នាំ និង៨ឆ្នាំហ្នឹង»។
កម្មករម្នាក់ទៀត អ្នកស្រី វឿន សំអឿង ដែលអះអាងថា បម្រើការងារនៅរោងចក្រនេះ ៥ឆ្នាំមកហើយនោះ បាននិយាយថា ក្រុមកម្មករ ទាមទារឲ្យថៅកែបើកផ្តាច់ប្រាក់អតីតភាពការងារឆ្នាំចាស់ៗឲ្យអស់មុនឆ្នាំ២០១៩នេះ ដោយសារកម្មករបារម្ភថា ច្បាប់ការងារថ្មីដែលរដ្ឋាភិបាលឲ្យអនុវត្តចាប់ពីឆ្នាំ២០១៩នេះទៅ នឹងធ្វើឲ្យថៅកែមិនទទួលស្គាល់ប្រាក់អតីតការងារពួកគេដែលខំធ្វើការងារជាច្រើនឆ្នាំហើយនោះ។
អ្នកស្រីបន្ថែមថា៖ «ពួកខ្ញុំចង់ឲ្យបើកផ្តាច់អាចាស់ហ្នឹងឲ្យអស់ ព្រោះរាល់ថ្ងៃ ពួកខ្ញុំធ្វើការ ខាងក្រុមហ៊ុនគេកៀបសង្កត់ណាស់។ អញ្ចឹង ពេលពួកខ្ញុំទ្រាំអត់បាន ខ្ញុំឈប់ទៅនឹងចោលប្រាក់អតីតភាពចាស់នោះ ដែលពួកខ្ញុំខំតស៊ូកន្លងមកហ្នឹង។ អញ្ចឹង ពួកខ្ញុំឲ្យក្រុមហ៊ុនបើកផ្តាច់ទៅ ទោះគាត់កៀបសង្កត់ពេលខ្ញុំឈប់ទៅ ក៏ពួកខ្ញុំមិនស្តាយដែរ»។
អភិបាលខណ្ឌដង្កោ លោក នុត ពុធដារ៉ា បានចុះទៅសម្របសម្រួលមិនឲ្យកម្មករតវ៉ាបិទផ្លូវ និងរៀបចំសណ្តាប់ធ្នាប់កន្លែងតវ៉ា ដោយក្នុងនោះ មានកម្លាំងសមត្ថកិច្ចប្រមាណជិត ៥០នាក់ ចាំឃ្លាំមើលផងដែរ។
នៅចំពោះមុខកម្មករ អភិបាលខណ្ឌរូបនេះ បានសន្យាថា នឹងជួយជំរុញទៅភាគីពាក់ព័ន្ធឲ្យពន្លឿនដោះស្រាយបញ្ចប់វិវាទជូនកម្មករ ដោយថា មិនចង់ឃើញកម្មករនៅក្នុងដែនសមត្ថកិច្ចបន្តតវ៉ាឡើយ ខណៈលោកថា មន្រ្តីក្រសួងការងារកំពុងជួបដោះស្រាយជាមួយភាគីរោងចក្រ។
មន្ត្រីផ្នែករដ្ឋបាលម្នាក់នៅរោងចក្រ សេឌូណូ បានប្រាប់ក្នុងលក្ខខណ្ឌមិនបញ្ចេញឈ្មោះថា ក្រុមហ៊ុនតែងតែដោះស្រាយវិវាទការងារតាមផ្លូវច្បាប់។
លោកបន្ថែមថា៖ «ខ្ញុំគ្រាន់តែប្រាប់ថា រាល់បញ្ហា គឺក្រសួងធ្វើតាមច្បាប់ដែលក្រសួងការងារគេកំណត់ យើងដើរក្រោមច្បាប់ យើងម៉េចធ្វើខុសពីច្បាប់កើត»។
អ្នកនាំពាក្យក្រសួងការងារ លោក ហេង សួរ បញ្ជាក់ថា បើទោះបីច្បាប់ថ្មីចូលជាធរមានក៏ដោយ ថៅកែរោងចក្រនៅតែមានតួនាទីទូទាត់ប្រាក់អតីតភាពការងារជូនកម្មករដដែល ហើយលោកថា រដ្ឋាភិបាលធានាមិនឲ្យកម្មករណាម្នាក់បាត់បង់អត្ថប្រយោជន៏ដោយសារតែក្រុមហ៊ុនក្ស័យធនឡើយ។ ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ប្រសិនបើកម្មករបម្រើការងារដោយប្រើកិច្ចសន្យាមិនកំណត់លើសពីពីរឆ្នាំឡើងទៅ ថៅកែត្រូវគិតប្រាក់អតីតភាពការងារជូនកម្មករ ដោយថា មិនដូច្នេះទេ ថៅកែនឹងមានកំហុស។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ប្រសិនបើកម្មករបម្រើការងារដោយប្រើកិច្ចសន្យាមិនកំណត់លើសពីពីរឆ្នាំឡើងទៅ ថៅកែត្រូវគិតប្រាក់អតីតភាពការងារជូនកម្មករ ដោយថា មិនដូច្នេះទេ ថៅកែនឹងមានកំហុស។
នៅក្នុងសប្តាហ៍នេះ កម្មកររាប់ពាន់នាក់បម្រើការងារតាមរោងចក្រនានា បានផ្ទុះការតវ៉ាជាបន្តបន្ទាប់ ដើម្បីទាមទារឲ្យថៅកែបើកប្រាក់អតីតភាពការងារ និងប្រាក់បំណាច់ឆ្នាំរបស់ជូនពួកគេ។ ក្រុមកម្មករទាំងនោះព្រមានថា ប្រសិនបើនៅតែពុំមានដំណោះស្រាយទេ ពួកគេនឹងនាំគ្នាហែរក្បួនទៅរកកិច្ចអន្តរាគមន៍ដល់ក្រសួងការងារ និងស្ថាប័ន្ធរដ្ឋពាក់ព័ន្ធផ្សេងទៀត៕
