រដ្ឋមន្ត្រីក្រសួងមហាផ្ទៃ លោក ស ខេង អំពាវនាវរកការគាំទ្រផ្នែកថវិកាពីដៃគូអភិវឌ្ឍ ដើម្បីពង្រឹងអភិបាលកិច្ចតាមបែបប្រជាធិបតេយ្យនៅថ្នាក់ក្រោមជាតិ ដោយថា ដៃគូអភិវឌ្ឍមួយចំនួនបានកាត់បន្ថយជំនួយដោយមិនបានគ្រោងទុក។
ការអំពាវនាវរបស់លោក ស ខេង ធ្វើឡើងក្នុងពិធីបិទសិក្សាសាលាជាតិ ស្តីពីការរៀបចំផែនការសកម្មភាពនិងថវិកាឆ្នាំ២០១៩ នៃគណៈកម្មាធិការជាតិសម្រាប់ការអភិវឌ្ឍនតាមបែបប្រជាធិបតេយ្យនៅថ្នាក់ក្រោមជាតិ នៅរាជធានីភ្នំពេញកាលពីម្សិលមិញ។
លោក ស ខេង ថ្លែងថា លោកអរគុណចំពោះដៃគូអភិវឌ្ឍដែលបានជួយឧបត្ថម្ភកម្ពុជា ប៉ុន្តែលោក បង្ហាញការខកចិត្តចំពោះដៃគូមួយចំនួន ដែលបានកាត់ផ្តាច់ជំនួយ ដោយមិនបានព្រាងទុក ធ្វើឲ្យរដ្ឋាភិបាលបង្ខំចិត្តបញ្ចេញប្រាក់ច្រើនជាងមុន ដើម្បីបន្តពង្រឹងយន្តការអភិបាលកិច្ចនៅថ្នាក់ក្រោមជាតិនេះ។
លោកថា៖ «អញ្ចឹង បានក្នុងគ្រោងថវិកាប្រមាណជា៥០០លានដុល្លារជាង ក្នុងនោះមានថវិការបស់ដៃគូអភិវឌ្ឍន៍ មានតែជាង៤០លានដុល្លារទេ។ អញ្ចឹងទេ បើសិនជាគំាទ្រសង្ឃឹមថាអាចបង្កើនថែមទៀតក៏ជាការល្អដែរ ដើម្បីធ្វើម៉េចឲ្យ ក្រុង ស្រុក អភិបាលថ្នាក់ក្រោមជាតិខ្ញុំនេះ មានលទ្ធភាពឈានទៅបំពេញបេសកកម្មរបស់ខ្លួនទទួលបានជោគជ័យ»។
យ៉ាងនេះក្តី លោក ស ខេង មិនបានបញ្ជាក់ថា ទឹកប្រាក់ដែលម្ចាស់ជំនួយបានកាត់ផ្តាច់នោះ មានចំនួនប៉ុន្មានពិតប្រាកដទេ។
តំណាងធនាគារអភិវឌ្ឍន៍អាស៊ី ADB ដែលបានចូលរួមក្នុងសិក្ខាសាលានេះ និងជាដៃគូអភិវឌ្ឍរបស់កម្ពុជាផងនោះ បានឲ្យដឹងតាមរយៈអ្នកបកប្រែថា ធនធានថវិកាជាផ្នែកសំខាន់មួយក្នុងការជំរុញដល់ប្រសិទ្ធិភាពនៃការពង្រឹងយន្តការប្រជាធិបតេយ្យនៅថ្នាក់កក្រោមជាតិ។
អ្នកស្រីបានលើកឡើងតាមរយៈអ្នកបកប្រែថា៖ «នាងខ្ញុំសូមសម្តែងនូវការវាយតម្លៃខ្ពស់ចំពោះរដ្ឋាភិបាលដែលបានបង្កើតនិងដាក់អនុវត្តនៅមូលនិធិវិនិយោគថ្នាក់ក្រោមជាតិសម្រាប់ការអភិវឌ្ឍហេដ្ឋារចនាសម្ព័ន្ធនៅថ្នាក់មូលដ្ឋាន »។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ជំនួយគ្រប់យ៉ាងឲ្យមកកម្ពុជា កើតចេញពីកិច្ចព្រមព្រៀងសន្តិភាពទីក្រុងប៉ារីស ដែលមានគោលបំណងពង្រឹងលទ្ធិប្រជាធិបតេយ្យ។
លោក សន ជ័យ ពន្យល់ថា ប្រទេសជាម្ចាស់ជំនួយ អាចនឹងសម្រេចចិត្តដកជំនួយទាំងនោះវិញនៅពេលឃើញរបត់នយោបាយកម្ពុជាបានដើរចេញពីគន្លងប្រជាធិបតេយ្យ។
លោកថា៖ «វាមានទំនាក់ទំនងគ្នា។ ឧទាហរណ៍ដែលគណបក្សសង្គ្រោះជាតិត្រូវបានគេរំលាយភ្លាមៗនោះ ឃើញមានម្ចាស់ជំនួយស៊ីដាច់គេ បានឈប់ផ្តល់ជំនួយដល់គម្រោងកំណែទម្រង់រដ្ឋបាលសាធារណរបស់រដ្ឋាភិបាល ។ ជាពិសេស គម្រោងដែលជួយទៅដល់ការអភិវឌ្ឍនៅថ្នាក់ក្រោមជាតិហ្នឹង ជាជំនួយជួយទៅដល់គោលនយោបាយកំណែទម្រង់វិមជ្ឈការនិងវិសហមជ្ឈការហ្នឹង»។
បើតាមលោក សន ជ័យ ដៃគូអភិវឌ្ឍនឹងសម្រុកមកជួយឧបត្ថម្ភដល់រដ្ឋាភិបាលកម្ពុជាវិញ នៅពេលដែលពួកគេមើលឃើញថា ស្ថានការណ៍នយោបាយវិលទៅរកលទ្ធិប្រជាធិបតេយ្យពិតប្រាកដឡើងវិញ៕