អាជ្ញាធរខេត្តព្រះសីហនុ លើកទឹកចិត្តទៅទេសចរទាំងអស់ដែលមានបំណងកម្សាន្តនៅខេត្តនេះនៅថ្ងៃឆ្លងឆ្នាំ គួរទាក់ទងទៅម្ចាស់សណ្ឋាគារ និងផ្ទះសំណាក់ កក់បន្ទប់ស្នាក់នៅទុកជាមុន ដោយថាដើម្បីបញ្ចៀសការឡើងថ្លៃបន្ទប់ស្នាក់នៅ។
អ្នកនាំពាក្យសាលាខេត្តព្រះសីហនុ លោក ឱម សារឿន មានប្រសាសន៍ថា តាមការព្យាករទុក ទេសចរជាតិ អន្តរជាតិ នឹងធ្វើដំណើរកំសាន្តទៅខេត្តព្រះសីហនុច្រើនជាងឆ្នាំមុន ដើម្បីចូលរួមឆ្លងឆ្នាំសកលខាងមុខនេះ ខណៈឆ្នាំមុនមានអ្នកចូលរួមចន្លោះពី៨ទៅ១២ម៉ឺននាក់។
អ្នកនាំពាក្យសាលាខេត្តព្រះសីហនុរូបនេះ បន្តថា កន្លងមកពិតជាមានភ្ញៀវទេសចរមួយចំនួនត្អូញត្អែរថា តម្លៃផ្ទះជួល សណ្ឋាគារ និងតម្លៃម្ហូបអាហារឡើងថ្លៃខ្ពស់ប្រាកដមែន។ ករណីនេះ លោកលើកទឹកចិត្តទៅភ្ញៀវទេសចរទាំងអស់ចូលទៅហ្វេសប៊ុកមន្ទីរទេសចរណ៍ខេត្ត រួចទាក់ទងទៅម្ចាស់សណ្ឋាគារ ផ្ទះសំណាក់ កក់កន្លែងស្នាក់នៅ ដើម្បីបញ្ចៀសការឡើងថ្លៃក្នុងថ្ងៃបុណ្យឆ្លងឆ្នាំសកល។
លោកមានប្រសាសន៍ថា៖ «ដើម្បីងាយស្រួលចូលទៅមើលក្នុងផេកហ្វេសប៊ុករបស់មន្ទីរទេសចរណ៍ គាត់បានផ្សព្វផ្សាយ ជាឈ្មោះសណ្ឋាគារ ហើយមានលេខទូរសព្ទដែលគាត់អាចទាក់ទងមកកក់មុន លទ្ធផលដែលយើងធ្វើបណ្តើរ យើងបានបង្ហោះជូននៅក្នុងហ្នឹង»។
ក្នុងលិខិតបង្គាប់ការចុះថ្ងៃទី២៨ ខែវិច្ឆិកា រដ្ឋបាលខេត្តព្រះសីហនុបានបញ្ជាមន្រ្តីរបស់ខ្លួនចំនួន៣នាក់ ឲ្យចុះទៅស្រង់តម្លៃបន្ទប់ជួល ផ្ទះសំណាក់ សណ្ឋាគារ រីហ្សត ឬបឹងហ្កាឡូស្ថិតនៅក្នុងខេត្តនេះ ដើម្បីធ្វើរបាយការណ៍ជូនថ្នាក់លើសម្រេចនិងដោះស្រាយ បន្ទាប់ពីផ្ទុះការរិះគន់ថា តម្លៃសេវាកម្មវិស័យទេសចរណ៍នៅខេត្តឆ្នេរសមុទ្រមួយនេះ ត្រូវបានដំឡើងខ្ពស់ហួសពីការទទួលយកបានរបស់ភ្ញៀវទេសចរក្នុងស្រុក។
ប្រធានក្រុមការងារទេសចរណ៍វិស័យឯកជន លោក ហូ វណ្ឌី មានប្រសាសន៍ថា ខេត្តព្រះសីហនុជាមុខសញ្ញាធ្វើឲ្យភ្ញៀវទេសចរជាតិ អន្តរជាតិរិះគន់ជារៀងរាល់ឆ្នាំជុំវិញការឡើងថ្លៃផ្ទះសំណាក់ សណ្ឋាគារ និងម្ហូបអាហារជាដើម។ លោកផ្តល់ជាអនុសាសន៍ថា បើម្ចាស់អាជីវកម្មទាំងនោះនៅតែឡើងថ្លៃខុសពីថ្ងៃធម្មតា លោកថា នឹងធ្វើឲ្យប៉ះពាល់ដល់សេដ្ឋកិច្ចមុខរបរពួកគេនិងមុខមាត់ជាតិនៅថ្ងៃអនាគត។
លោកផ្តល់ជាអនុសាសន៍ថា៖ «ទីមួយគាត់ត្រូវរក្សានូវក្រមសីលធម៌វិជ្ជាជីវៈរបស់ខ្លួន ទីពីរគាត់ត្រូវរក្សាតម្លៃគោលមួយ សមស្របមួយ ពីព្រោះក្នុងករណីគាត់ធ្វើអ្វីមួយខុសប្រក្រតី មានន័យថា គាត់បំផ្លាញខ្លួនគាត់ និងបំផ្លាញអ្នកជិតខាង ហើយអាចបំផ្លាញកិត្តិយសជាតិទាំងមូលក៏អាចថាបាន»។
បើតាមស្ថិតិភ្ញៀវទេសចរណ៍ដែលមកកម្សាន្តខេត្តព្រះសីហនុ ក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុករយៈពេល៣ថ្ងៃ គឺចាប់ពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨នេះ ខេត្តព្រះសីហនុទទួលភ្ញៀវបរទេសសរុបប្រមាណ ៦៣,០០០ ម៉ឺននាក់ ថយចុះ២៥.៨៨ % ក្នុងនោះភ្ញៀវជាតិមានចំនួនប្រមាណ ៥០,២៣០នាក់ ថយចុះ ៣២.០៧% ភ្ញៀវអន្តរជាតិ មានចំនួនប្រមាណ ១២,៧៧០នាក់ កើនឡើងប្រមាណ១៥.៥៦%៕
