លោកនាយករដ្ឋមន្ត្រី ហ៊ុន សែន បានអំពាវនាវឲ្យប្រទេសប្រកាន់របបសេរីកុំឲ្យយកហេតុផលសិទ្ធិមនុស្សនិងប្រជាធិបតេយ្យមកដាក់ទណ្ឌកម្មលើកម្ពុជានាំឲ្យប៉ះពាល់ជាថ្មីទៀតដល់សេចក្តីសុខ របស់ប្រជាពលរដ្ឋ។
នៅក្នុងពិធីសម្ពោធវិមានឈ្នះឈ្នះនៅព្រឹកនេះ លោកនាយករដ្ឋមន្ត្រី ហ៊ុន សែន លើកឡើងថា ក្រោមការដឹកនាំរបស់លោកបានប្រែក្លាយទីតាំងដែលមានសង្គ្រាមទៅជាកន្លែងដែលមានការអភិវឌ្ឍន៍មានផ្សារ មានផ្ទះប្រជាពលរដ្ឋរស់នៅ។
លោក ហ៊ុន សែន ក៏បានរំឭកកុំឲ្យប្រទេសលោកសេរីយកហេតុផលសិទ្ធិមនុស្ស និងប្រជាធិប តេយ្យដាក់ទណ្ឌកម្មនាំឲ្យកម្ពុជាមានសង្គ្រាមឡើងវិញ។
លោក ហ៊ុន សែន៖ «កំហុសលើកទី១ តែអ្នកបានគាំទ្ររដ្ឋប្រហារយោធា តើនោះជាលទ្ធិប្រជាធិបតេយ្យឬជាលទ្ធិយោធានិយម? ទី២ អ្នកធ្លាប់បានគាំទ្រប៉ុលពតដែល ធ្លាប់បានសម្លាប់ មនុស្សគ្មានបានគិតពីសិទ្ធិមនុស្សនោះទេ អ្នកបានគាំទ្រពួកគេឲ្យអង្គុយនៅអង្គការសហប្រជា ជាតិរយៈពេល១២ឆ្នាំ។ ដូច្នេះ សង្ឃឹមថា ប្រទេសទាំងនោះ មិនធ្វើកំហុសលើកទី៣ ដែលដាក់ ទណ្ឌកម្មចំពោះអ្នកដែលបានខិតខំរក្សាសន្តិភាព ខិតខំរក្សាសេចក្តីសុខ និងអាយុជីវិតរបស់ ប្រជាជន។»
ការលើកឡើងរបស់លោកនាយករដ្ឋមន្ត្រី ហ៊ុន សែន នៅពេលនេះ ស្របពេលសហភាពអឺរ៉ុប កំពុងតែដំណើរការសិក្សាពីការដកប្រព័ន្ធអនុគ្រោះពន្ធបើកម្ពុជាមិនធ្វើឲ្យស្ថានភាពសិទ្ធិមនុស្ស និងលទ្ធិប្រជាធិបតេយ្យឲ្យប្រសើរឡើង។ ចំណែកសហរដ្ឋអាមេរិកក៏មានវិធានការ បន្តបន្ទាប់លើកម្ពុជាក្នុងហេតុផលដូចអឺរ៉ុបដែរ៕