លោកនាយករដ្ឋមន្ត្រីហ៊ុន សែនថ្លែងជាសាធារណៈថា រូបលោកមិនមែនជាមនុស្សបុគ្គល និយមទេ ចំពោះការលើកឡើងពីគុណសម្បត្តិក្នុងការកសាងប្រទេសជាតិឲ្យមានការរីក ចម្រើន។
ក្នុងពិធីសម្ពោធវិមានឈ្នះឈ្នះនៅព្រឹកនេះលោកហ៊ុន សែនលើកឡើងថា ឯកសារ និងរូបភាព នៅវិមាននេះមានរូបលោកច្រើនមិនមែនមានន័យថា លោកជាមនុស្សបុគ្គលនិយមចង់តាំង ខ្លួនជាអទិទេពទេ។ ប៉ុន្តែលោកថា រូបលោកនិងភរិយាមានប្រវត្តិច្រើនក្នុងការកសាងទឹកដី នេះ។
លោកហ៊ុន សែន៖ «ខ្ញុំមិនមែនចង់ឲ្យចាត់ទុកខ្ញុំជាបុគ្គលអទិទេពអ្វីនោះទេ ប៉ុន្តែអ្វីដែលសំខាន់ តួអង្គពាក់ព័ន្ធក្នុងរឿងនេះគឺខ្លួនខ្ញុំនៅទីនោះច្រើន។ ខ្ញុំមិនមែនជាមនុស្សបុគ្គលនិយមទេ ក៏ប៉ុន្តែខ្លួនខ្ញុំនិងភរិយាបានផ្សាភ្ជាប់ជាមួយ និងទឹកដីនេះតាំងពីកម្សត់កម្រ។»
នៅក្នុងសុន្ទរកថា ជិត២ម៉ោងនៅព្រឹកនេះ លោកនាយករដ្ឋមន្ត្រីហ៊ុន សែន បានលើកឡើង ច្រើនទាក់ទងប្រវត្តិតស៊ូរបស់លោកក្នុងការផ្តួលរំលំរបបខ្មែរក្រហម ការដោះស្រាយបញ្ហាធំៗ និងការកសាងប្រទេសជាតិ។ លោកក៏បានលើកឡើងពីគុណសម្បត្តិមន្ត្រីជាន់ខ្ពស់មួយចំនួន រួមមានទាំងលោក ជា ស៊ីម លោក ហេង សំរិន និងលោក ទៀ បាញ់ជាដើម។
