មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា បទល្មើសគ្រឿងញៀនសរុបជាង ៨ពាន់ករណី ត្រូវបានសមត្ថកិច្ចបង្ក្រាបបាននៅទូទាំងប្រទេសគិតចាប់តាំងពីដើមខែមករា រហូតដល់ត្រឹមថ្ងៃទី៣០ខែធ្នូ ឆ្នាំ២០១៨នេះ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធ បានឲ្យដឹងថា បទល្មើសគ្រឿងញៀនសរុប ៨ ០០៣ករណី ត្រូវបានសមត្ថកិច្ចបង្ក្រាបបាននៅទូទាំងប្រទេស ក្នុងនោះបទល្មើសជួញដូរមានចំនួន ៥ ០៥១ករណី។
បើតាមមន្ត្រីរូបនេះ អាជ្ញាធរបានឃាត់ខ្លួនជនល្មើសបានចំនួន ១៦ ២០២នាក់ ក្នុងនោះស្រីមានចំនួន ១ ៣៤១នាក់ និងជនបរទេស ៣១០នាក់ ហើយជនបរទេសទាំងនោះមានសញ្ជាតិ ២៤ផ្សេងគ្នា។
តាមរបាយការណ៍លទ្ធផលប្រចាំឆ្នាំ ចំនួនអ្នកប្រើប្រាស់គ្រឿងញៀនឆ្នាំនេះ បានកើនឡើងពីចំនួន ១០ ៩៦២នាក់ នៅឆ្នាំ២០១៧ ទៅដល់ចំនួន ១៦ ២០២នាក់ នៅឆ្នាំ២០១៨នេះ។
របាយការណ៍នេះ បានឲ្យដឹងផងដែរថា សារធាតុដែលបានរឹបអូសរួមមាន សារធាតុញៀនគ្រប់ប្រភេទជាង ៥៣៣គីឡូក្រាម និង ៣២៩កញ្ចប់ រួមទាំងកញ្ឆាក្រៀម ៧៤គីឡូក្រាម និងកញ្ឆាដើម ១៦៤,៤២៥ដើម ផងដែរ៕