គ្រោះថ្នាក់ចរាចរណ៍កើតឡើងទូទាំងប្រទេសរយៈពេល១២ខែកន្លងមកនេះ បានបណ្ដាលឲ្យមនុស្ស ១,៧៦១នាក់ បាត់បង់ជីវិត ដែលតួលេខនេះថយចុះ១ភាគរយបើប្រៀបធៀបនឹងរយៈពេលដូចគ្នាកាលពីឆ្នាំ២០១៧។
នេះបើយោងតាមរបាយការណ៍គ្រោះថ្នាក់ចរាចរណ៍ផ្លូវគោកឆ្នាំ២០១៨ ប្រៀបធៀបឆ្នាំ២០១៧ ដែល វី.អូ.ឌី ទទួលបាននៅថ្ងៃនេះពីនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃក្រសួងមហាផ្ទៃ។
របាយការណ៍ដដែល បង្ហាញថា គ្រោះថ្នាក់ចរាចរណ៍ទូទាំងប្រទេសបានកើតឡើងចំនួន៣,២៦៧ ករណី ថយចុះ៧ភាគរយបើប្រៀបធៀបនឹងរយៈពេលដូចគ្នាកាលពីឆ្នាំ២០១៧។ ប្រភពដដែល ឲ្យដឹងផងដែរថា គ្រោះថ្នាក់ចរាចរណ៍ក្នុងរយៈពេល១២ខែមកនេះ បានបណ្ដាលឲ្យពលរដ្ឋ៤,៧៧០នាក់ផ្សេងទៀតរងរបួសធ្ងន់ និងស្រាល។
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ លោក រុន រ័ត្នវាសនា បានប្រាប់ វី.អូ.ឌី បន្ថែមនៅថ្ងៃនេះថា រាជធានីភ្នំពេញមានករណីគ្រោះថ្នាក់ចរាចរណ៍ច្រើនជាងគេ ពីព្រោះតែកត្តាចំនួនប្រជាជន និងយាន្តជំនិះច្រើន ម៉្យាងវិញទៀត គ្រឿងស្រវឹងនៅតែជាកត្តាចម្បងដែលបង្ករឲ្យមានគ្រោះថ្នាក់ចរាចរណ៍ច្រើនជាងគេ ជាពិសេសគឺការប្រើប្រាស់គ្រឿងស្រវឹងនៅពេលយប់។ លោក រុន រ័ត្នវាសនា បានទទួលស្គាល់ថា ថ្វីត្បិតតែចំនួនអ្នកស្លាប់ដោយសារគ្រោះថ្នាក់មានការថយចុះក៏ដោយ ប៉ុន្តែតួលេខនៃការស្លាប់នៅតែមានចំនួនច្រើន។
លោក រុន រ័ត្នវាសនា បានបញ្ជាក់ផងដែរថា នាដើមឆ្នាំ២០១៩នេះ ស្ថាប័នពាក់ព័ន្ធនឹងមានរៀបចំមហាសន្និបាតដើម្បីផ្សព្វផ្សាយពីផែនការយុទ្ធសាស្រ្ត ដើម្បីបញ្ជ្រាបការយល់ដឹងក្នុងកាត់បន្ថយគ្រោះថ្នាក់ចរាចរណ៍៕
កាលពីឆ្នាំ២០១៧ កន្លងទៅ គ្រោះថ្នាក់ចរាចរណ៍ បានកើតឡើង៣,៥៣១ បណ្ដាលឲ្យមនុស្ស១,៧៨០ នាក់ ស្លាប់បាត់បង់ជីវិត៕