មន្ត្រីជាន់ខ្ពស់ក្រសួងការពារជាតិបានឲ្យដឹងថា រយៈពេលក្នុងមួយឆ្នាំកន្លងទៅនេះ កងទ័ពជើងគោក បានចូលរួមទប់ស្កាត់ និងបង្ក្រាបបទល្មើសផ្សេងៗតាមព្រំដែន សរុបបានចំនួនជាង៥ពាន់លើក។
អ្នកនាំពាក្យក្រសួងការពារជាតិ លោក ឈុំ សុជាត បានបង្ហោះរបាយការណ៍បូកសរុបក្នុងកិច្ចប្រជុំបូកសរុបលទ្ធផលការងារឆ្នាំ២០១៨ និងលើកទិសដៅអនុវត្តបន្តឆ្នាំ២០១៩ លើបណ្តាញសង្គមរបស់លោកថា ឆ្នាំ២០១៨កន្លងទៅនេះ កងទ័ពជើងគោក បានសហការ ល្បាតការពារ និងត្រួតពិនិត្យបង្គោលសីមា ភូមិសាស្ត្រ ទទួលខុសត្រូវលើគ្រប់វិស័យនៅតាមតំបន់ព្រំដែន ដើម្បីក្តាប់សភាពការណ៍នៅតាមខ្សែបន្ទាត់ព្រំដែន ទប់ស្កាត់ និងបង្ក្រាបបទល្មើសផ្សេងៗ សរុបបានចំនួន ៥,១៩៣លើក។ ប្រភពដដែលឲ្យដឹងថា សកម្មភាពបង្រ្កាបទាំងនោះ បានធ្វើឡើងនៅតាមព្រំដែនកម្ពុជា-ថៃ ២,៤៩៧លើក កម្ពុជា-វៀតណាម១,២៥០លើក និងកម្ពុជា-ឡាវ ១,៤៤៦លើក។
លោក សុជាត បញ្ជាក់ថា ក្រសួងការពារជាតិបានសហការជាមួយកងយោធពលខេមរភូមិន្ទ និងស្ថាប័នពាក់ព័ន្ធផ្សេងទៀត ដើម្បីចូលរួមទប់ស្កាត់បទល្មើសផ្សេងៗ និងសកម្មភាពឆ្លងដែនខុសច្បាប់ ព្រមទាំងបានបន្តកិច្ចសហប្រតិបត្តិការល្អជាមួយប្រទេសជិតខាង ដោះស្រាយបញ្ហាផ្សេងៗដែលកើតមានដោយសន្តិវិធី ប្រែក្លាយតំបន់ព្រំដែន ប្រកបដោយសុខសន្តិភាព អភិវឌ្ឍន៍ និងកិច្ចសហប្រតិបត្តិការផងដែរ៕
