ក្រសួងការងារ បានអះអាងថា យ៉ាងហោចណាស់កម្មករ ៥០នាក់ បានរងរបួស បន្ទាប់ពីរថយន្តដឹកពួកគេ បានបុកជាមួយរថយន្តដឹកសាំងនៅឯស្រុកស្វាយទាប ខេត្តស្វាយរៀង នៅព្រឹកថ្ងៃនេះ។
ក្នុងសេចក្ដីប្រកាសព័ត៌មានរបស់ក្រសួងការងារ និងបណ្ដុះបណ្ដាលវិជ្ជាជីវៈ រថយន្តមួយគ្រឿងដែលដឹកកម្មករចំនួន ៦០នាក់ បានបុកជាមួយរថយន្តដឹកប្រេងសាំងនៅម៉ោង ៦កន្លះព្រឹកថ្ងៃនេះ នៅចំណុចភូមិលៀប ស្ថិតក្នុងស្រុកកណ្ដៀងរាយ ដោយបណ្ដាលឲ្យកម្មករ ៥០នាក់រងរបួសស្រាលទាំងអស់។
បើតាមក្រសួងការងារ កម្មកររងរបួស ៤៩នាក់ ត្រូវបានសមត្ថកិច្ចបញ្ជូនទៅសង្គ្រោះនៅឯមន្ទីរពេទ្យបង្អែកស្រុកស្វាយទាប ខណៈកម្មករម្នាក់ទៀត ត្រូវបានបញ្ជូនទៅព្យាបាលនៅឯមន្ទីរពេទ្យបង្អែកខេត្ត។
របាយការណ៍របស់នគរបាលជាតិ បានឲ្យដឹងថា មនុស្សដល់ទៅ ១៧៦១នាក់ បានស្លាប់ ហើយ ៤៧៧០នាក់ទៀត បានរងរបួសធ្ងន់ស្រាល នៅក្នុងគ្រោះថ្នាក់ចរាចរណ៍នៅទូទាំងប្រទេសកាលពីឆ្នាំ២០១៨កន្លងមកនេះ៕
