មន្ត្រីនគរបាលជាតិ បានឲ្យដឹងថា យ៉ាងហោចណាស់មនុស្ស ២២នាក់ បានស្លាប់ និង ៤៩នាក់ទៀត បានរងរបួស នៅក្នុងហេតុការណ៍គ្រោះថ្នាក់អគ្គិភ័យនៅទូទាំងប្រទេសកាលពីឆ្នាំកន្លងមកនេះ។
ប្រធានការិយាល័យរដ្ឋបាលនៃអគ្គនាយកដ្ឋាននគរបាលពន្លត់អគ្គិភ័យ លោក ង៉ែត សាម៉ុន បានប្រាប់សារព័ត៌មាន វី.អូ.ឌី នៅថ្ងៃនេះថា គ្រោះអគ្គិភ័យ ៥៣៤ករណី ត្រូវបានរាយការណ៍ថា បានកើតឡើងនៅទូទាំងប្រទេសនៅក្នុងឆ្នាំ២០១៨កន្លងមកនេះ ដោយបានកើនឡើង ២០ករណី បើធៀបនឹងតួលេខគ្រោះអគ្គិភ័យកាលពីឆ្នាំ២០១៧កន្លងមក។
មន្ត្រីនគរបាលរូបនេះ បានឲ្យដឹងទៀតថា គ្រោះអគ្គិភ័យនៅទូទាំងប្រទេស បានសម្លាប់មនុស្សយ៉ាងតិច ២២នាក់ និងបណ្ដាលឲ្យមនុស្ស ៤៩នាក់ទៀតរងរបួស ខណៈដែលផ្ទះសម្បែងពលរដ្ឋដល់ទៅ ៥៤៥ខ្នង ក៏បានទទួលរងការខូចខាតផងដែរ។
បើតាមមន្ត្រីនគរបាលរូបនេះ គ្រោះអគ្គិភ័យ ៧៧ករណី បានកើតឡើងនៅរាជធានីភ្នំពេញ ដែលធ្វើឲ្យទីក្រុងមួយនេះនាំមុខជាតំបន់មានករណីអគ្គិភ័យកើតឡើងច្រើនជាងគេ បើធៀបនឹងបណ្ដាខេត្តដទៃទៀតនៅទូទាំងប្រទេស ខណៈដែលខេត្តកែបពុំមានករណីអគ្គិភ័យកើតឡើងនោះឡើយនៅឆ្នាំកន្លងមកនេះ។
លោក ង៉ែត សាម៉ុន បានបញ្ជាក់ថា ករណីអគ្គិភ័យដល់ទៅ ៤០ភាគរយ បណ្ដាលមកពីឆ្លងចរន្តអគ្គិសនី ៣៩ភាគរយបណ្ដាលមកពីផ្ទុះចង្ក្រានហ្គាស និង ២១ភាគរយ មិនត្រូវបានគេដឹងពីមូលហេតុច្បាស់លាស់នោះឡើយ។
កាលពីឆ្នាំ២០១៧កន្លងទៅ ករណីអគ្គិភ័យបានកើតឡើងចំនួន ៥១៤ករណីទូទាំងប្រទេស ដែលបានបណ្ដាលឲ្យមនុស្សស្លាប់ ២៣នាក់និងរបួស ៥៣នាក៕
