របាយការណ៍បង្ហាញថា ភ្ញៀវទេសចរចិនចូលមកទស្សនារមណីយដ្ឋានអង្គរមានការកើនឡើងជាង២០ភាគរយនៅឆ្នាំ២០១៨ បើធៀបនឹងតួលេខកាលពីឆ្នាំ២០១៧ ដែលនេះបង្ហាញថា ភ្ញៀវទេសចរចិនមានចំនួនច្រើនជាងគេ។
កាលពីថ្ងៃសុក្រកន្លងមកនេះ សារព័ត៌មានចិនស៊ីនហួរបានចុះផ្សាយរបាយការណ៍ថា ភ្ញៀវទេសចរចិនចូលមកទស្សនារមណីយដ្ឋានអង្គរ មានចំនួន ១.១២លាននាក់នៅឆ្នាំ២០១៨ ដោយបានកើនឡើង ២៣ភាគរយ បើធៀបនឹងតួលេខកាលពីឆ្នាំ២០១៧។
បើតាមរបាយការណ៍ចេញផ្សាយដោយសារព័ត៌មានចិនស៊ីនហួរ ភ្ញៀវទេសចរចិនមានចំនួនច្រើនជាងគេ និងតាមពីក្រោយដោយភ្ញៀវទេសចរមកពីប្រទេសកូរ៉េខាងត្បូង ដែលស្ថិតនៅចំណាត់ថ្នាក់ទី២ និងសហរដ្ឋអាមេរិកស្ថិតនៅចំណាត់ថ្នាក់ទី៣។
បើតាមរបាយការណ៍ នៅឆ្នាំ២០១៨ ភ្ញៀវទេសចរអន្ដរជាតិចូលមកទស្សនារមណីយដ្ឋានអង្គរមានចំនួន ២.៥៩លាននាក់ មកពីប្រទេសចំនួន ១៩៤ លើពិភពលោក ពោលគឺចំនួននេះកើនឡើង ៥ភាគរយ បើប្រៀបធៀបនឹងឆ្នាំ២០១៧ ក្នុងនោះ កម្ពុជារកចំណូលបានពីការលក់សំបុត្របានចំនួន ១១៦លានដុល្លារអាមេរិក ដែលចំនួននេះកើនឡើង ៨ភាគរយធៀបនឹងឆ្នាំ២០១៧៕