សាលាដំបូងរាជធានីភ្នំពេញបានច្រានចោលសំណើរបស់ក្រុមមេធាវីការពារក្ដីឲ្យមេដឹកនាំអតីតបក្សប្រឆាំង លោក កឹម សុខា ដែលស្នើសុំឲ្យទម្លាក់ការចោទប្រកាន់លើរូបលោក។
ក្នុងសេចក្ដីសម្រេចចុះថ្ងៃទី៤ ខែមករា ឆ្នាំ២០១៨ ចៅក្រមស៊ើបសួរនៃសាលាដំបូងរាជធានីភ្នំពេញ លោក គី ឫទ្ធី បានសម្រេចបដិសេធសំណើរបស់សហមេធាវីរបស់លោក កឹម សុខា ដែលបានស្នើទៅតុលាការកាលពីថ្ងៃទី២៧ ខែធ្នូឆ្នាំមុន ឲ្យទម្លាក់បទចោទប្រកាន់លើមេដឹកនាំអតីតបក្សប្រឆាំងរូបនេះ។
ចៅក្រមរូបនេះ បានលើកហេតុផលថា សំណុំរឿងលោក កឹម សុខា កំពុងស្ថិតក្នុងនីតិវិធីស៊ើបសួរ និងប្រមូលភស្ដុតាងបន្ថែមនៅឡើយ។
មេដឹកនាំអតីតគណបក្សសង្គ្រោះជាតិ លោក កឹម សុខា បានបន្តស្ថិតនៅក្រោមការឃុំខ្លួនក្នុងផ្ទះចាប់តាំងពីខែកញ្ញាឆ្នាំ២០១៨ ពោលគឺជាង ១ឆ្នាំ ក្រោយពីលោកត្រូវបានចាប់ខ្លួន និងបញ្ជូនទៅដាក់ឃុំនៅឯពន្ធនាគារត្រពាំងផ្លុង កាលពីដើមខែកញ្ញាក្នុងឆ្នាំ២០១៧ ក្រោមការចោទប្រកាន់ពីរដ្ឋាភិបាលថា «ក្បត់ជាតិ»៕
