រដ្ឋមន្ដ្រីក្រសួងមហាផ្ទៃលោក ស ខេង ទៅបំពេញទស្សនកិច្ចរយៈពេល៥ថ្ងៃនៅប្រទេសវៀតណាម ដើម្បីពិភាក្សាបញ្ហាជាប់ព្រំដែនប្រទេសទាំងពីរ។
យោងតាមការចុះផ្សាយរបស់នាយកដ្ឋានព័ត៌មានវិទ្យានៃក្រសួងមហាផ្ទៃ នៅថ្ងៃពុធនេះ រដ្ឋមន្ដ្រីក្រសួងមហាផ្ទៃ លោក ស ខេង បានចាប់ផ្ដើមដំណើរបំពេញទស្សនកិច្ចរយៈពេល៥ថ្ងៃ នៅប្រទេសវៀតណាម ដែលចាប់ផ្ដើមពីថ្ងៃទី៩ រហូតដល់ថ្ងៃទី១៣ ខែមករា ឆ្នាំ២០១៩។
បើតាមប្រភពខាងលើនេះ លោក ស ខេង នឹងដឹកនាំកិច្ចប្រជុំថ្នាក់មន្ត្រីជាន់ខ្ពស់លើកទី១០ស្ដីពីកិច្ចសហប្រតិបត្តិការ និងការអភិវឌ្ឍរវាងបណ្ដាខេត្តជាប់ព្រំដែនកម្ពុជា-វៀតណាម នាទីក្រុងហូជីមិញ ប្រទេសវៀតណាម។
សារព័ត៌មាន Vietnam News បានចុះផ្សាយថា ក្នុងជំនួបមួយជាមួយលោកនាយករដ្ឋមន្ដ្រី ហ៊ុន សែន កាលពីខែធ្នូ ឆ្នាំ២០១៨កន្លងមកនេះ មេដឹកនាំជាន់ខ្ពស់គណបក្សកុម្មុយនីស្តវៀតណាមលោក ង្វៀន ភូជុង បានជំរុញឲ្យរដ្ឋាភិបាលកម្ពុជា និងវៀតណាមរួមគ្នាបញ្ចប់ឯកសារបោះបង្គោលព្រំដែន និងការងារកំណត់ខ្សែបន្ទាត់ព្រំដែននៅឆ្នាំ២០១៩ បន្ទាប់ពីសម្រេចបាន៨៤ភាគរយហើយនោះ៕
