រដ្ឋបាលជលផលប្រកាសថា ការប្រមូលផលត្រីនេសាទសម្រាប់ធ្វើផ្អក ប្រហុក និង ត្រីឆ្អើរ នឹងចាប់ផ្តើមពីថ្ងៃស្អែក រហូតដល់សប្តាហ៍ក្រោយ។
យោងតាមសេចក្ដីជូនដំណឹងរបស់រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទចុះថ្ងៃទី៨ ខែមករា ឆ្នាំ២០១៩ បានឲ្យដឹងថា គន្លងដាយនៅដងទន្លេសាប ក្នុងភូមិសាស្រ្តរាជធានីភ្នំពេញ និងខេត្តកណ្ដាលអាចនេសាទត្រីបានច្រើនបន្តទៀតចាប់ពីថ្ងៃទី១១ រហូតដល់ថ្ងៃទី១៧ ខែមករា ឆ្នាំ២០១៩ ប្រសិនបើមេឃស្រឡះគ្មានភ្លៀងកក់ខែ ឬទទួលរងឥទ្ធិពលព្យុះ។
រដ្ឋបាលជលផលបានអញ្ជើញប្រជាពលរដ្ឋដែលមានបំណងធ្វើប្រហុក ផ្អក និង ត្រីឆ្អើរ មកទិញត្រីពីប្រជានេសាទនៅតាមភូមិសាស្រ្តនិងពេលវេលាដែលបានបញ្ជាក់ខាងលើឲ្យទាន់ពេលវេលាសម្រាប់ទុកបរិភោគ។
គួររំលឹកផងដែរថា រដ្ឋបាលជលផលបានជូនដំណឹងម្តងរួចហើយដល់សាធរណជនទៅធ្វើផ្អក និងប្រហុក ដោយចាប់ពីថ្ងៃទី១៤ ដល់ថ្ងៃទី២០ ខែធ្នូ ឆ្នាំ២០១៨ នៅតាមដងទន្លេសាបក្នុងទីក្រុងភ្នំពេញ និងខេត្តកណ្ដាល។