យុវជនម្នាក់ ត្រូវបានតុលាការរាជធានីភ្នំពេញសម្រេចកាត់ទោសដាក់ពន្ធនាគាររយៈពេល ៣ឆ្នាំ ក្រោមការចោទប្រកាន់ថា បានប្រមាថព្រះមហាក្សត្រ ដែលនេះគឺជាករណីដំបូងហើយដែលជនស៊ីវិលកម្ពុជាម្នាក់ ត្រូវបានកាត់ទោស បន្ទាប់ពីច្បាប់ការពារព្រះមហាក្សត្រ បានចូលជាធរមានកាលពីដើមឆ្នាំមុន។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាន់ឌី បានប្រាប់ VOD នៅថ្ងៃនេះថា យុវជន អៀង ជលសារ ត្រូវបានកាត់ទោសឲ្យជាប់ពន្ធនាគាររយៈពេល ៣ឆ្នាំ និងពិន័យជាប្រាក់ចំនួន ៥លានរៀល នាថ្ងៃទី០៩ ខែមករា ម្សិលមិញនេះ។
យុវជន អៀង ជលសារ ត្រូវបានសមត្ថកិច្ចចាប់ខ្លួននៅខណ្ឌចំការមន ក្នុងរាជធានីភ្នំពេញ កាលពីថ្ងៃទី១៥ ខែមិថុនា ឆ្នាំ២០១៨ តែ ២ថ្ងៃប៉ុណ្ណោះក្រោយពីយុវជនរូបនេះ បានបង្ហោះសារលើគណនីហ្វេសប៊ុករបស់ខ្លួន ដែលត្រូវបានសមត្ថកិច្ចចាត់ទុកជាការប្រមាថព្រះមហាក្សត្រ។
យុវជនរូបនេះ គឺជាជនស៊ីវិលកម្ពុជាដំបូងគេ ដែលត្រូវបានតុលាការសម្រេចកាត់ទោសដាក់ពន្ធនាគារ បន្ទាប់ពីច្បាប់ការពារព្រះមហាក្សត្រ ត្រូវបានដាក់ឲ្យអនុវត្តកាលពីខែមីនាឆ្នាំមុន ក្រោយពីរដ្ឋាភិបាលកម្ពុជាស្នើបង្កើតច្បាប់ប្រឆាំងនឹងការប្រមាថព្រះមហាក្សត្រ៕