ប្រមុខការទូតអាមេរិក បានថ្លែងនៅថ្ងៃនេះថា លោកនឹងស្នើទៅរាជទាយាទអារ៉ាប៊ីសាអ៊ូឌីត ព្រះអង្គម្ចាស់ ម៉ូហាម៉េដ ប៊ីន សាល់ម៉ាន់ ឲ្យធានាថា ឃាតករសម្លាប់អ្នកកាសែត លោក ចាម៉ាល់ ខាហ្សូហ្គី នឹងត្រូវទទួលខុសត្រូវចំពោះឃាតកម្មនេះ។ នេះបើតាមការចុះផ្សាយរបស់ទីភ្នាក់ងារព័ត៌មាន APF។
AFP បានចុះផ្សាយបន្តទៀតថា រដ្ឋមន្ត្រីការបរទេសអាមេរិក លោក ម៉ៃឃ៍ ភុំផេអូ បានថ្លែងបែបនេះនៅមុនដំណើរទស្សនកិច្ចដ៏សំខាន់របស់លោកទៅកាន់ប្រទេសអារ៉ាប៊ីសាអ៊ូឌីត ជាប្រទេសដែលរងការថ្កោលទោសពីអន្តរជាតិយ៉ាងតឹងតែង ជុំវិញឃាតកម្មទៅលើ ខាហ្សូហ្គី នៅក្នុងស្ថានកុងស៊ុល ស្ថិតនៅទីក្រុងអ៊ីស្តង់ប៊ុល។
លោកបានថ្លែងប្រាប់ដល់សន្និសិទ្ធសារព័ត៌មាននៅក្នុងប្រទេសកាតា ថា លោកនឹងបន្តជជែកជាមួយរាជទាយាទ និងរដ្ឋាភិបាលអារ៉ាប៊ីសាអ៊ូឌីត អំពីការធានាថា ការទទួលខុសត្រូវមានលក្ខណៈពេញលេញ និងគ្រប់ជ្រុងជ្រោយ ទាក់ទិនទៅនឹងឃាតកម្មមិនអាចទទួលយកបានទៅលើលោក ចាម៉ាល់ ខាហ្សូហ្គី។
ប្រមុខការទូតអាមេរិករូបនេះ គ្រោងធ្វើទស្សនៈកិច្ចទៅប្រទេសអារ៉ាប់ប៊ីសាអូឌីត នៅថ្ងៃចន្ទនេះ ដែលជាផ្នែកមួយនៃដំណើររយៈពេល ៨ថ្ងៃទៅកាន់ទីក្រុងជាច្រើននៅតំបន់អារ៉ាប់។
អ្នកកាសែត ខាហ្សូហ្គី ត្រូវបានគេសម្លាប់នៅថ្ងៃទី២ ខែតុលា ដែលករណីនេះបានធ្វើឱ្យពិភពលោកមានការភ្ញាក់ផ្អើល និងគំរាមកំហែងដល់ការបែកបាក់គ្នាយ៉ាងធ្ងន់ធ្ងររវាងទីក្រុងរីយ៉ាដ នៃប្រទេសអារ៉ាប់ប៊ីសាអូឌីត និងទីក្រុងវ៉ាស៊ីងតោន នៃសហរដ្ឋអាមេរិច៕
