ខ្យល់ពុលក្នុងទីក្រុងបាងកក កំពុងគំរាមកំហែងដល់សុខភាពធ្ងន់ធ្ងរ

អាជ្ញាធរនិងអ្នកជំនាញព្រមានថា ខ្យល់អាកាសទីក្រុងបាងកកប្រទេសថៃ បានក្លាយទៅជាការគំរាមកំហែងធ្ងន់ធ្ងរចំពោះសុខភាព ដោយសារតែកម្រិតនៃការបំពុលដែលបណ្តាលមកពីផ្សែងនៅលើទីក្រុងបានកើនឡើង កន្លែងខ្លះលើស៨ដងខ្ពស់ជាងកម្រិតសុវត្ថិភាព។

យោងតាមការបង្ហាញពីភាពខ្មៅងងឹតនៃផ្សែងអ័ព្ទដែលហ៊ុំព័ទ្ធរាជធានីរបស់ប្រទេសថៃ ក្រុមមន្រ្តីបានព្រមានថា ផ្សែងពុលដែលជាសមាសធាតុផ្សំពីធូលីនិងសារធាតុពុលខ្យល់ផ្សេងៗទៀតបានក្លាយទៅជាការគំរាមកំហែងធ្ងន់ធ្ងរដល់សុខភាព។

ក្រុមអ្នកបរិស្ថាន Greenpeace លើកឡើងថា ក្រុងបាងកកបច្ចុប្បន្នជា ទីក្រុងដែលមានការបំពុលបរិស្ថានលំដាប់ទី១0នៅលើពិភពលោក ដែលប្រហាក់ប្រហែលទៅនឹងទីក្រុងមួយចំនួននៅក្នុងប្រទេសចិន ដែលមូលហេតុចម្បងរួមមាន ផ្សែងពីចរាចរណ៍ និងការបំពុលពីរោងចក្រ។

ក្រសួងពាក់ព័ន្ធរបស់ប្រទេសថៃ គ្រោងដាក់ពង្រាយយន្តហោះទៅលើពពកបាញ់សារធាតុម្យ៉ាងបង្កើតទឹកភ្លៀងសិប្បនិម្មិត ដើម្បីបំបែកសារធាតុពុលក្នុងខ្យល់។ ប៉ុន្តែវិធីនេះមិនអាចដោះស្រាយបានភ្លាមៗនោះទេ។​​

អ្នកឯកទេសខាងសុខភាពបានលើកឡើងថា ការបំពុលខ្យល់គឺជាឃាតករលាក់មុខ ហើយប្រជាពលរដ្ឋថៃជាច្រើនមើលរំលង ដូច្នេះមិនមានមនុស្សច្រើនទេដែលការពារខ្លួនឯងដោយពាក់ម៉ាស់ ឬដំឡើងឧបករណ៍សំអាតខ្យល់នៅផ្ទះរបស់គេ។

ថៃក៏កំពុងពិចារណាលើវិធានការកាត់បន្ថយចំនួនរថយន្ត និងបិទសាលារៀនមួយចំនួននៅតំបន់ដែលមានហានិភ័យខ្ពស់។