សហភាពអឺរ៉ុបបានសម្រេចជាជំហានដំបូងយកពន្ធនាំចូលអង្ករពីប្រទេសកម្ពុជា តាមការស្នើសុំរបស់សមាជិក ដើម្បីការពារតម្លៃផលិតអង្ករក្នុងតំបន់។
តាមការចុះផ្សាយរបស់ទីភ្នាក់ងារព័ត៌មានរ៉យទ័រកាលពីថ្ងៃទី១៤ ខែមករា ឆ្នាំ២០១៩ បញ្ជាក់ថា គណៈកម្មការអឺរ៉ុបសម្រេចយកពន្ធអង្ករពីកម្ពុជា និងមីយ៉ាន់ម៉ា ក្នុងរយៈពេល៣ឆ្នាំខាងមុខ។
តាមគម្រោងរបស់អឺរ៉ុប ការចាប់ផ្តើមឆ្នាំដំបូងយកពន្ធ ២០០,៧៣ដុល្លារក្នុង១តោន ហើយពន្ធនឹងមានការទម្លាក់ចុះបន្តិចនៅឆ្នាំបន្ទាប់។
ទោះយ៉ាងណាការសម្រេចនេះ ក៏ទុកពេលឲ្យភាគីពាក់ព័ន្ធផ្សេងទៀតប្តឹងជំទាស់ ហើយបើមិនមានការជំទាស់ទេ នឹងចាប់ផ្តើមអនុវត្តន៍ចាប់ពីថ្ងៃសុក្រសប្តាហ៍នេះ។
ការសម្រេចរបស់គណៈកម្មការអឺរ៉ុបធ្វើឡើងតាមការស្នើរបស់រដ្ឋាភិបាលអ៊ីតាលី ដោយថា ដើម្បីរក្សាតម្លៃអង្ករនៅបណ្តាប្រទេសអឺរ៉ុបដែលផលិតមានការកើនឡើង។
គណៈកម្មការអឺរ៉ុបរកឃើញថា ការអនុគ្រោះពន្ធនាំអង្ករចូលពីកម្ពុជានិងមីយ៉ាន់ម៉ា បានធ្វើឲ្យប៉ះពាល់ដល់ដំណើរការផលិតអង្ករក្នុងតំបន់ស្របពេលបច្ចុប្បន្នប្រទេសចំនួន៨នៅភាគខាងត្បូងអឺរ៉ុបផលិតអង្ករកើនឡើងចាប់ពីប្រទេស Portugal ដល់ Bulgaria។