អតីតឧត្តមទីប្រឹក្សាជាន់ខ្ពស់គណបក្សសង្គ្រោះជាតិ លោក គង់ គាំ និងកូនប្រុសរបស់លោកត្រូវបានព្រះមហាក្សត្រចេញព្រះរាជក្រឹត្យលើកលែងទោសឲ្យធ្វើនយោបាយឡើងវិញ ក្រោយអ្នកទាំងពីររូបនេះ ដាក់លិខិតស្នើសុំទៅក្រសួងមហាផ្ទៃ។
កាលពីថ្ងៃទី៩ ខែមករា លោក គង់ គាំ និងកូនរបស់គាត់គឺ លោក គង់ បូរ៉ា ដាក់លិខិតទៅរដ្ឋមន្ត្រីក្រសួងមហាផ្ទៃជាផ្លូវការ ដើម្បីស្នើសុំសិទ្ធិធ្វើនយោបាយឡើងវិញ។
ក្នុងព្រះរាជក្រឹត្យចំនួនពីរចុះថ្ងៃទី១៥ ខែមករា ដូចគ្នា ព្រះមហាក្សត្របរមនាថ នរោត្តម សីហមុនី បានត្រាស់បង្គាប់ឲ្យលោក គង់ គាំ និងកូនប្រុសគឺ គង់ បូរ៉ា បានធ្វើនយោបាយឡើងវិញ។
លោក គង់ គាំ និងកូនប្រុសពីរនាក់ទៀតរបស់លោក ក្នុងចំណោមថ្នាក់ដឹកនាំអតីតបក្សប្រឆាំង ១១៨នាក់ផ្សេងទៀត ត្រូវបានតុលាការកំពូលសម្រេចហាមឃាត់សិទ្ធិធ្វើនយោបាយរយៈពេល ៥ឆ្នាំ កាលពីពាក់កណ្ដាលខែវិច្ឆិកា ឆ្នាំ២០១៧ ចំពេលដែលគណបក្សសង្គ្រោះជាតិ ត្រូវបានតុលាការសម្រេចរំលាយចោល៕