រដ្ឋាភិបាលបានបន្ថែមមន្ត្រីជាន់ខ្ពស់មួយចំនួនទៀត ទៅក្នុងគណៈបញ្ជាការសន្តិសុខអចិន្ត្រៃយ៍សម្រាប់ការពារសន្តិសុខអំឡុងពេលបោះឆ្នោតអសកល និងការត្រួតពិនិត្យបញ្ជីបោះឆ្នោតឆ្នាំថ្មីនាពេលខាងមុខនេះ។
អំឡុងខែមិថុនា ឆ្នាំ២០១៦ រដ្ឋាភិបាលបានសម្រេចបង្កើត គណៈបញ្ជាការនេះ មានរដ្ឋមន្ត្រីក្រសួងមហាផ្ទៃ លោក ស ខេង ជាប្រធាន និង អនុប្រធាន រដ្ឋមន្ត្រីក្រសួងការពារជាតិ លោក ទៀ បាញ់ រួមទាំងមន្ត្រី ៣៦រូបទៀតជាសមាជិក។
ប៉ុន្តែ អនុក្រឹត្យស្តីពីការកែសម្រួលនៃការបង្កើតគណៈបញ្ជាការសន្តិសុខអចិន្ត្រៃយ៍ ចុះថ្ងៃទី១០ មករានេះ រដ្ឋាភិបាលបានសម្រេចបន្ថែមមន្ត្រីជាន់ខ្ពស់ ២រូបទៀត ឲ្យធ្វើជាអនុប្រធានគណៈបញ្ជាការនេះ មានរដ្ឋមន្ត្រីក្រសួងការបរទេស លោក ប្រាក់ សុខុន និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូនព័ន្ធ មុនីរ័ត្ន និងមន្ត្រី ៣៩រូបទៀតជាសមាជិក ។
សមាជិកទាំង ៣៩នាក់នោះ ក៏មានរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ រដ្ឋមន្ត្រីក្រសួងការងារ លោក អ៊ិត សំហេង អគ្គស្នងការនរគបាលជាតិ លោក នេត សាវឿន អគ្គមេបញ្ជាការកងយោធពលខេមរភូមិន្ទ លោក វង្ស ពិសេន និងមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ផងដែរ។
តាមអនុក្រឹត្យដដែលនេះ គណៈបញ្ជាការអចិន្ត្រៃយ៍នេះ ត្រូវធ្វើរបាយការណ៍ជាប្រចាំអំពីស្ថានការណ៍សន្តិសុខអំឡុងពេលបោះឆ្នោតជ្រើសរើសក្រុមប្រឹក្សារាជធានា ខេត្ត ស្រុក ខណ្ឌ និងអំឡុងពេលពិនិត្យបញ្ជីឈ្មោះបោះឆ្នោតឆ្នាំ២០១៩។ គណៈបញ្ជាការនេះក៏មានសិទ្ធិប្រើប្រាស់ត្រារបស់ទីស្តីការគណៈរដ្ឋមន្ត្រីសម្រាប់បំពេញកិច្ចការផ្សេងៗរបស់ខ្លួនផងដែរ៕
