រដ្ឋាភិបាលវៀតណាមកំពុងរៀបចំខ្លួនធ្វើជាម្ចាស់ផ្ទះសម្រាប់ជំនួបជាលើកទី២ រវាងមេដឹកនាំអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន នៅដើមខែកុម្ភៈ។
តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ គឺមេដឹកនាំប្រទេសទាំងពីរនោះធ្វើដំណើរទៅកាន់វៀតណាម ចន្លោះពីថ្ងៃទី៤ ដល់ថ្ងៃទី៨ ខែកុម្ភៈ គឺចំពេលពិធីបុណ្យចូលឆ្នាំវៀតណាម។
មន្ត្រីជាន់ខ្ពស់អាមេរិក និងកូរ៉េខាងជើងបានជួបគ្នានៅក្នុងទីក្រុងវ៉ាស៊ីនតោនក្នុងសប្តាហ៍នេះ បានជជែកពីរបៀបវារៈដែលមេដឹកនាំទាំងពីរនឹងជជែកគ្នាជាលើកទី២។ ក្នុងនោះរបៀបវារៈសំខាន់គឺការរំសាយកម្មវិធីអាវុធនុយក្លេអ៊ែរបស់កូរ៉េខាងជើង។
បច្ចុប្បន្ន វៀតណាមបានដើរនយោបាយការទូតទំនាក់ទំនងល្អទាំងជាមួយអាមេរិក និងជាមួយកូរ៉េខាងជើង។
កាលពីចុងខែវិច្ឆិកាឆ្នាំ២០១៨ រដ្ឋមន្ត្រីការបរទេសកូរ៉េខាងជើង លោក Ri Yong Ho បានធ្វើដំណើរទស្សនកិច្ចទៅវៀតណាម ដើម្បីរៀនសូត្រពីការធ្វើដំណែទម្រង់សេដ្ឋកិច្ច។ ឆ្នាំមុន វៀតណាមបាននាំទំនិញទៅកូរ៉េខាងជើងដែលភាគច្រើនជាផលិតផលអាហារក្នុងទំហំទឹកប្រាក់៧,៣លានដុល្លារ។
ចំណែកជាមួយអាមេរិកចាប់តាំងពីអាមេរិកដកទណ្ឌកម្មអាវុធលើវៀតណាមកាលពីឆ្នាំ២០១៦មក ទំនាក់ទំនងប្រទេសទាំងពីរកាន់តែស្និទ្ធស្នាលឡើង។
នៅឆ្នាំ២០១៨ វៀតណាមនាំទំនិញទៅលក់នៅអាមេរិកក្នុងទំហំទឹកប្រាក់៤៧,៥៣ប៊ីលានដុល្លារ កើនឡើង១៤,៣ ភាគរយ បើធៀបឆ្នាំ២០១៧។ របាយការណ៍រដ្ឋាភិបាលវៀតណាមឲ្យដឹងទៀតថា ទំនិញនាំចេញ២០ភាគរយរបស់ប្រទេសនេះគឺយកទៅលក់នៅអាមេរិក។