រដ្ឋាភិបាលនឹងចល័តអាវុធនិងរថពាសដែកចូលរាជធានីភ្នំពេញនៅថ្ងៃស្អែក​

សាលារាជធានីភ្នំពេញបានជូនដំណឹងពីផ្លូវមួយចំនួន​ដែលត្រូវចល័តអាវុធនិងរថពាសដែកនៅថ្ងៃស្អែក ដើម្បីប្រារព្ធខួប២០ឆ្នាំនៃការបង្កើតកងទ័ពជើងគោក។​

តាមសេចក្តីជូនដំណឹង អាវុធនិងរថពាសដែក នឹងចល័តពីបញ្ជាការដ្ឋានអង្គរក្សក្រុងតាខ្មៅទៅបញ្ជាការដ្ឋានកងទ័ពជើងគោកក្នុងខណ្ឌពោធិ៍សែនជ័យ នៅថ្ងៃទី១៩ ខែមករា។ សាលារាជធានីបញ្ជាក់ថា ការល័តនេះត្រៀមប្រារព្ធពិធីនៅថ្ងៃទី២៤ ខែមករា ដើម្បីអបអរខួបគម្រប់២០ឆ្នាំនៃថ្ងៃបង្កើតបញ្ចាការដ្ឋានកងទ័ពជើងគោក។

ការចល័តអាវុធ និងរថពាសដែកនេះនឹងធ្វើដំណើរតាមផ្លូវព្រែកហូរ ផ្លូវ៦០ម៉ែត្របន្តកាត់ផ្លូវ២១៧ ផ្លូវព្រៃស ឆ្លងផ្លូវជាតិលេខ៣ តាមផ្លូវប្រទះប្រឡាង  ផ្លូវបេតុងតំបន់សេដ្ឋកិច្ចពិសេស ដល់ផ្លូវជាតិលេខ៤ បត់ស្តាំទៅទីតាំងបញ្ជាការដ្ឋានកងទ័ពជើងគោកដែលស្ថិតក្នុងសង្កាត់កន្ទោក ខណ្ឌពោធិ៍សែនជ័យ ក្រុងភ្នំពេញ។

រដ្ឋាភិបាលក៏បានអំពាវនាវប្រជាពលរដ្ឋដែលរស់នៅក្នុងរាជធានីភ្នំពេញ និងប្រជាពលរដ្ឋដែលរស់នៅតាមដងផ្លូវខាងលើកុំឲ្យមានការភ្ញាក់ផ្អើល។