ប្រជាពលរដ្ឋថៃដែលជំរុញឲ្យមានការដឹកនាំតាមបែបប្រជាធិបតេយ្យប្រកាសថា ពួកគេនឹងដើរតវ៉ាតាមផ្លូវក្នុងទីក្រុងបាងកកជាថ្មីទៀត ដើម្បីទាមទារឲ្យរដ្ឋាភិបាលយោធារៀបចំការបោះឆ្នោតតាមការសន្យា។
តាមគម្រោងរដ្ឋាភិបាលយោធាថៃសន្យារៀបចំការបោះឆ្នោតនៅថ្ងៃទី២៤ ខែកុម្ភៈ ប៉ុន្តែរដ្ឋាភិបាលយោធាបាននេះប្រកាសពន្យារពេលទៅថ្ងៃទី៩ ខែឧសភាវិញ ដោយថា ជាន់ថ្ងៃគ្នាក្នុងការរៀបចំពិធីឡើងគ្រងរាជសម្បត្តិក្សត្រថ្មី Maha Vajiralongkorn ដែលគ្រោងធ្វើឡើងនៅថ្ងៃទី៤ ខែឧសភា។
ចាប់តាំងពីការធ្វើរដ្ឋប្រហារទម្លាក់រដ្ឋាភិបាលស៊ីវិលកាលពីខែឧសភា ឆ្នាំ២០១៤មក ការពន្យារពេលរៀបបោះឆ្នោតធ្វើឡើង៥លើករួចមកហើយ។
ចំណែកពលរដ្ឋថៃបានដើរតាមផ្លូវក្នុងទីក្រុងបាងកក តវ៉ាទាមទារឲ្យមានការរៀបចំបោះឆ្នោតតាមសន្យា ចំនួន៣លើករួចមកហើយក្នុងខែមករានេះ។
កាលពីថ្ងៃអង្គារដើមសប្តាហ៍នេះ អគ្គមេបញ្ជាការយោធា លោក Apirat Kongsompong បានហៅថា ការតវ៉ារបស់ប្រជាពលរដ្ឋនៅពេលនេះថា ជាការបង្កឲ្យមានបញ្ហា។ លោកបាន ព្រមានចាត់វិធានការបើសិនជា ពលរដ្ឋធ្វើសកម្មភាពតវ៉ាហួសដែនកំណត់។
ទោះយ៉ាងណាអ្នករៀបចំការតវ៉ាលោកស្រី Nuttha Mahattana ថ្លែងថា ពួកគាត់នឹងប្រមូលផ្តុំតវ៉ាជាថ្មីទៀតនៅថ្ងៃសៅរ៍ចុងសប្តាហ៍នេះ។ លោកស្រីបារម្ភថា ពួកយោធានឹងកាន់អំណាចរហូត បើការបោះឆ្នោតចេះតែពន្យារពេលបន្តបន្ទាប់នោះ។