នគរបាលជាតិបានផ្សាយថា តារាកំប្លែងនៅកម្ពុជាពីររូប នាយកុយ និងនាយក្រិន បានរងរបួស និងត្រូវបានបញ្ជូនទៅសង្គ្រោះនៅឯមន្ទីរពេទ្យ បន្ទាប់ពីរថយន្តរបស់ពួកគេបានជួបគ្រោះថ្នាក់ចរាចរណ៍នៅខេត្តត្បូងឃ្មុំ ខណៈពេលពួកគេធ្វើដំណើរត្រឡប់មកពីខេត្តរតនគិរី។
ស្នងការនគរបាលខេត្តត្បូងឃ្មុំ លោក បែន រ័ត្ន ត្រូវបានដកស្រង់សម្ដីចុះផ្សាយដោយគេហទំព័រនគរបាលជាតិ ដែលបាននិយាយថា តារាកំប្លែង លោក ជួង ជី ហៅនាយកុយ និងលោក ទេស សុជន ហៅនាយក្រិន បានជួបគ្រោះថ្នាក់ចរាចរណ៍នៅលើផ្លូវលេខ ៧៣ ឃុំតំបែរ ស្រុកតំបែរ នៅព្រឹកថ្ងៃអាទិត្យ ទី២០មករានេះ ដោយសាររថយន្ដម៉ាកឡង់គ្រីស័រពណ៌ស ដែលបើកបរដោយលោក ជួង ជី បានបែកកង់ និងរ៉េចង្កូតទៅបុកដើមឈើ។
បើតាមលោក បែន រ័ត្ន ក្រោយហេតុការណ៍គ្រោះថ្នាក់ចរាចរណ៍នេះ លោក ជួង ជី ហៅនាយកុយ បានរងរបួសកែងដៃស្ដាំ ចំណែកលោក ទេស សុជន ហៅនាយក្រិន ក៏ទទួលរងគ្រោះថ្នាក់ផងដែរ។
របាយការណ៍នគរបាលជាតិ បានឲ្យដឹងថា មនុស្សដល់ទៅ ១,៧៦១នាក់ ត្រូវបានសម្លាប់នៅក្នុងគ្រោះថ្នាក់ចរាចរណ៍កើតឡើងទូទាំងប្រទេសកាលពីឆ្នាំ២០១៨កន្លងមកនេះ ដែលតួលេខនេះថយចុះ ១ភាគរយបើប្រៀបធៀបនឹងរយៈពេលដូចគ្នាកាលពីឆ្នាំ២០១៧៕