លោកនាយករដ្ឋមន្ដ្រី ហ៊ុន សែន បានចាប់ផ្ដើមដំណើរទស្សនកិច្ចទៅកាន់ប្រទេសចិនហើយនៅថ្ងៃព្រឹកថ្ងៃនេះ ជាដំណើរទស្សនកិច្ចត្រូវបានលោកលើកឡើងថា ដើម្បីពង្រីកកិច្ចសហប្រតិបត្តិការជាយុទ្ធសាស្ដ្របន្ថែមទៀត។
ទំព័រហ្វេសប៊ុកលោកនាយករដ្ឋមន្ដ្រី ហ៊ុន សែន ឲ្យដឹងថា លោកចាប់ផ្ដើមដំណើរទស្សនកិច្ចរយៈពេល ៤ថ្ងៃទៅកាន់ប្រទេសចិន ដែលចាប់ផ្ដើមពីថ្ងៃទី២០ ដល់ថ្ងៃទី២៣ ខែមករា។
បើតាមហ្វេសប៊ុក ក្នុងដំណើរទស្សនកិច្ចនេះ លោក ហ៊ុន សែន គ្រោងជួបជជែកពិភាក្សាជាមួយប្រធានាធិបតីចិន លោក ស៊ី ជីនពីង នាយករដ្ឋមន្ត្រីចិន លោក លី ឃឹជាំង ប្រធានសភាប្រឹក្សានយោបាយចិន លោក វ៉ាង យ៉ាង និងមេដឹកនាំចិនដទៃទៀត។
ក្រៅពីនេះ លោក ហ៊ុន សែន ក៏មានជំនួបដាច់ដោយឡែកជាមួយប្រធានមន្ទីរទំនាក់ទំនងអន្តរជាតិរបស់គណៈកម្មាធិការមជ្ឈឹមបក្សកុម្មុយនីស្តចិន លោករដ្ឋមន្ត្រី សុង តាវ ប្រធានសមាគមមិត្តភាពចិន-កម្ពុជា លោកស្រី គូ សៀវលៀន និងថ្នាក់ដឹកនាំធុរៈកិច្ច ៤រូបទៀត មកពីធនាគារចិន សាជីវកម្មស្ពានថ្នល់ចិន ក្រុមហ៊ុនវិស្វកម្ម និងដែកថែប និងក្រុមហ៊ុនហួណេងគ្រុប។
ដំណើរទស្សនកិច្ចរបស់លោកនាយករដ្ឋមន្ដ្រី ហ៊ុន សែន ត្រូវបានធ្វើឡើងតែ ៤ថ្ងៃប៉ុណ្ណោះក្រោយពីសហភាពអឺរ៉ុប បានសម្រេចយកពន្ធលើអង្ករនាំចូលពីប្រទេសកម្ពុជា និងប្រទេសភូមា សម្រាប់រយៈពេល ៣ឆ្នាំជាប់គ្នា ទៅតាមសំណើបណ្ដាសមាជិកដែលជាប្រទេសផលិតអង្ករនៅក្នុងសហគមន៍មួយនេះ៕
