ភ្លើងឆេះព្រៃបានរាលដល់ចំការស្វាយចន្ទីរបស់ប្រជាពលរដ្ឋដែលធ្វើឲ្យខូចខាតដំណាំស្វាយចន្ទីប្រមាណ៣០ហិចតា ក្នុងស្រុកគាស់ក្រឡ ខេត្តបាត់ដំបង កាលពីម្សិលមិញ ។
យោងតាមរបាយការណ៍របស់អធិការដ្ឋាននគរបាលស្រុកគាស់ក្រឡ បានឲ្យដឹងថា ករណីភ្លើងឆេះព្រៃ ពីចំណុចជើងភ្នំសំរោង បានឆេះរាលមកដល់ចំការស្វាយចន្ទីរបស់ឈ្មោះ ឈឿន ម៉ាណែត ស្ថិតក្នុងឃុំធិបតី ស្រុកគាស់ក្រឡ ដែលបណ្តាលឲ្យខូចខាតដំណាំស្វាយចន្ទីប្រមាណ30ហិចតា។
អធិការនគរបាលស្រុកគាស់ក្រឡ លោក ឆាង វណ្ណឆៃ បានឲ្យដឹងថា មូលហេតុបណ្ដាលឲ្យឆេះព្រៃនេះ គឺមកពីប្រជាពលរដ្ឋធដុតព្រៃសម្រាប់ចាប់សត្វព្រៃ និងកណ្តុរ ទើបឆេះរាលដល់ចំការស្វាយចន្ទីនេះ។ លោកថា រថយន្តពន្លត់អគ្គិភ័យមិនអាចចូលដល់ចំការចន្ទីបាននោះទេព្រោះផ្លូវពិបាក ហើយកងកម្លាំងស្រុកនិងឃុំបានចុះជួយអន្តរាគមន៍។
ក្រសួងបរិស្ថានបានចេញសេចក្ដីជូនដំណឹង កាលពីថ្ងៃទី២១ ខែមករា ឆ្នាំ២០១៩ ស្ដីពី ការការពារ និងទប់ស្កាត់ភ្លើងឆេះព្រៃ ក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ដោយណែនាំអាជ្ញាធរចាត់វិធានការទប់ស្កាត់ប្រជាពលរដ្ឋដុតព្រៃដើម្បីចាប់សត្វ ព្រមទាំងដុតព្រៃដើម្បីរានដីធ្វើចំការ។