គណៈកម្មាធិការអឺរ៉ុបបានស្នើសុំឲ្យសមាជិករបស់ខ្លួនជួបជុំគ្នានៅចុងខែនេះ ដើម្បីពិគ្រោះយោបល់លើការសម្រេចក្នុងការព្យួរEBAពីកម្ពុជា។ នេះបើយោងតាមសារព័ត៌មានអន្ដរជាតិ Bloomberg។
សារព័ត៌មាន Bloomberg ដែលមានមូលដ្ឋាននៅទីក្រុងញូវយ៉ក សហរដ្ឋអាមេរិក បានចុះផ្សាយកាលពីម្សិលមិញ ដោយបានដកស្រង់សម្ដីមន្ដ្រីរបស់សហភាពអឺរ៉ុប២រូប ដែលសុំមិនបញ្ចេញឈ្មោះ មកចុះផ្សាយថា គណៈកម្មាធិការអឺរ៉ុប នៅទីក្រុងព្រុចស៊ែល ប្រទេសប៊ែលហ្សិច បានស្នើសុំបណ្ដារដ្ឋាភិបាលដែលជាសមាជិករបស់សហភាពអឺរ៉ុប ឲ្យផ្ដល់ភ្លើងខៀវ ពាក់ព័ន្ធបញ្ហាព្យួរប្រពន្ធអនុគ្រោះពីកម្ពុជា នៅត្រឹមថ្ងៃទី២៩ខែមករា។
សារព័ត៌មាន Bloomberg ចុះផ្សាយទៀតថា បើទោះបីជាមានការយល់ព្រមពីសមាជិកក៏ដោយ ប៉ុន្ដែ ការសម្រេចចុងក្រោយ គឺស្ថិតនៅលើគណៈកម្មាធិការអឺរ៉ុបដដែល ដែលមានរយៈពេល១២ខែសម្រាប់ដំណើរការដកហូតប្រព័ន្ធអនុគ្រោះពន្ធនេះ។
ការស្នើសុំសេចក្ដីសម្រេចចិត្តពីបណ្ដាប្រទេសជាសមាជិកនេះ គឺធ្វើឡើងបន្ទាប់ពីស្នងការនៃគណៈកម្មការអឺរ៉ុបទទួលបន្ទុកផ្នែកពាណិជ្ជកម្ម លោកស្រី សេស៊ីលីយ៉ា ម៉ាលស្ត្រុម បានជួបពិភាក្សាជាមួយរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន កាលពីថ្ងៃទី២១ មករាកន្លងទៅ នៅទីក្រុងព្រុចស៊ែល ប្រទេសប៊ែលហ្សិច៕
