បុរសម្នាក់ ត្រូវបានភ្លើងឆេះរហូតដល់ស្លាប់ ក្រោយពីបើកបរទោចក្រយានយន្តដឹកសាំង ទៅបុកនឹងរថយន្តដែលចតចោលនៅខណ្ឌទួលគោក នៅព្រឹកថ្ងៃនេះ។ នេះបើតាមការផ្សព្វផ្សាយរបស់នគរបាលជាតិ។
គេហទំព័រហ្វេសប៊ុកនគរបាលជាតិ បានចុះផ្សាយថា បុរសម្នាក់ បានបើកម៉ូតូដឹកសាំង ហើយបុកនឹងរថយន្តដែលចតចោលបណ្ដាលឲ្យផ្ទុះឆេះស្លាប់នៅកន្លែងកើតហេតុដែលស្ថិតនៅផ្លូវ៣៣៧ ក្នុងសង្កាត់បឹងកក់១ ខណ្ឌទួលគោក។
ប៉ុន្តែ គេហទំព័រនគរបាលជាតិ ពុំបានបង្ហាញអត្តសញ្ញាបុរសម្នាក់នោះឡើយ។
រូបថតលើគេហទំព័រនគរបាលជាតិ បង្ហាញមនុស្សម្នាក់ត្រូវភ្លើងឆេះស្លាប់នៅជិតទោចក្រយានយន្ត និងរថយន្តមួយគ្រឿង ដែលរុំព័ទ្ធទៅដោយកម្ទេចផេះផង់។
កាលពីឆ្នាំ២០១៨កន្លងទៅ គ្រោះថ្នាក់ចរាចរណ៍បានបណ្ដាលឲ្យមនុស្ស ១៧៦១នាក់ បាត់បង់ជីវិត និងបណ្ដាលឲ្យពលរដ្ឋ ៤៧៧០នាក់ផ្សេងទៀតរងរបួសធ្ងន់ និងស្រាល៕