ក្រសួងការបរទេសចិន បានច្រានចោលព័ត៌មានដែលថាប្រទេសខ្លួនជាការគំរាមកំហែងដ៏ធំមួយសម្រាប់សហរដ្ឋអាមេរិក។
អ្នកនាំពាក្យក្រសួងការបរទេសចិន លោកស្រី Hua Chunying បានថ្លែងក្នុងសន្និសីទសារព័ត៌មានប្រចាំថ្ងៃកាលពីម្សិលមិញ ថា របាយការណ៍របស់អាមេរិកដែលថា ចិន និងរុស្ស៊ី ជាការគំរាមកំហែងមួយដ៏ធំដល់អាមេរិក ជាការចោទប្រកាន់ដែលគ្មានមូលដ្ឋាន ហើយចិនប្រឆាំងដាច់ខាតចំពោះការលើកឡើងនេះ។ លោកស្រី បន្តថា ចិន បាននិយាយជាច្រើនលើកហើយ ថាប្តេជ្ញាធ្វើការអភិវឌ្ឍតាមមាគា៌សន្តិភាព និងប្រកាន់គោលការណ៍ការពារខ្លួនតែប៉ុណ្ណោះ។
អ្នកនាំពាក្យក្រសួងការបរទេសចិនរូបនេះ បានបន្ថែមថា ចិនតែងតែដើរតួនាទីជាស្ថាបនិកសន្តិភាព អ្នកចូលរួមក្នុងការអភិវឌ្ឍ និងជាអ្នកថែរក្សាសណ្ដាប់ធ្នាប់ពិភពលោក។ លោកស្រី Hua Chunying ក៏បានប្រាប់ទៅអាមេរិកផងដែរថា គួរតែបោះបង់នូវការចោទប្រកាន់ និងគំនិតដែលហួសសម័យបែបនេះទៅ។
កាលពីថ្ងៃទី២២ ខែមករា ឆ្នាំ២០១៩ កន្លងទៅ ទីភ្នាក់ងារស៊ើបការសម្ងាត់របស់អាមេរិក បានចេញរបាយការណ៍មួយដែលនិយាយពីការគំរាមកំហែងដែលប្រទេសខ្លួនកំពុងប្រឈម។ របាយការណ៍នោះ បានលើកឡើងថា ការគំរាមកំហែងទាំងនោះមានដូចជា កិច្ចខិតខំប្រឹងប្រែងរបស់រុស្ស៊ីក្នុងការពង្រីកឥទ្ធិពល និងការធ្វើទំនើបកម្មវិស័យយោធារបស់ចិនជាដើម៕