អាជ្ញាធររាជធានីភ្នំពេញ បានសម្រេចមិនអនុញ្ញាតឲ្យសង់រោងកម្មវិធីអ្វីទាំងអស់នៅលើដងផ្លូវសាធារណៈទាំងអស់នៅក្នុងរាជធានីភ្នំពេញចាប់ពីពាក់កណ្ដាលឆ្នាំនេះតទៅ។
ក្នុងសេចក្ដីណែនាំរបស់រដ្ឋបាលរាជធានីភ្នំពេញចុះថ្ងៃទី៧ ខែធ្នូ ឆ្នាំ២០១៨ ដែល វីអូឌី ទើបទទួលបាននៅថ្ងៃនេះ អភិបាលរាជធានីភ្នំពេញ លោក ឃួង ស្រេង បានសម្រេចថា អាជ្ញាធររាជធានីភ្នំពេញនៅអនុញ្ញាតឲ្យប្រជាពលរដ្ឋប្រើប្រាស់ផ្លូវមួយចំណែកសម្រាប់សង់រោងកម្មវិធីផ្សេងៗរហូតដល់ត្រឹមថ្ងៃទី៣០ ខែមិថុនាខាងមុខ ប៉ុន្តែ លោកថា អនុញ្ញាតឲ្យសង់រោងត្រឹមតែចំណែក ១ភាគ ២ នៃទ្រូងផ្លូវប៉ុណ្ណោះ។
ក្នុងសេចក្ដីណែនាំដដែលនោះ លោក ឃួង ស្រេង បានសម្រេចទៀតថា ប្រជាពលរដ្ឋនឹងមិនអាចសង់រោងកម្មវិធីនានានៅលើចំណែកណាមួយនៃដងផ្លូវតទៅទៀតឡើយ ចាប់ពីថ្ងៃទី១ ខែកក្កដាតទៅ។
បើតាមសេចក្ដីណែនាំនេះ រាល់រោងកម្មវិធីទាំងអស់ ត្រូវបានសាលារាជធានីភ្នំពេញ តម្រូវឲ្យរៀបចំធ្វើឡើងនៅតាមទីតាំងឯកជន ទីតាំងសាធារណៈមួយចំនួន ដូចជា វត្តអារាម ឬព្រះវិហារ ជាដើម។
សាលារាជធានីភ្នំពេញ បានសម្រេចបែបនេះ ជាផ្នែកមួយនៃវិធានការរៀបចំសណ្ដាប់សាធារណៈ និងយុទ្ធនាការរំដោះចិញ្ចើមផ្លូវ ដែលត្រូវបានចាប់ផ្ដើមឡើងតាំងពីឆ្នាំ២០១៧មកម៉្លេះ៕