សហរដ្ឋអាមេរិក បានប្រកាសទទួលស្គាល់ប្រធានរដ្ឋសភានិងជាមេដឹកនាំបក្សប្រឆាំង ជាប្រធានាធិបតីប្រទេសវេណេស៊ុយអេឡាបណ្ដោះអាសន្នជំនួសប្រធានាធិបតីបច្ចុប្បន្នលោក នីកូឡាស ម៉ាឌូរ៉ូ។
លោក Juan Guaido ប្រធានរដ្ឋសភាវេណេស៊ុយអេឡា បានប្រកាសខ្លួនជាប្រធានាធិបតីរដ្ឋាភិបាលអន្តរកាលជាបណ្ដោះអាសន្ន ក្នុងអំឡុងពេលដែលលោកដឹកនាំបាតុកម្មកាលម្សិលមិញ។
ក្រសួងការបរទេសអាមេរិក បានបញ្ជាក់ក្នុងសេចក្តីថ្លែងការណ៍មួយដែលចេញកាលពីម្សិលមិញ ថា អាមេរិកគាំទ្រប្រធានរដ្ឋសភា លោក Juan Guaido ជាប្រធានាធិបតីប្រទេសវេណេស៊ុយអេឡាជាបណ្ដោះអាសន្ន។ សេចក្តីប្រកាសព័ត៌មានដដែល ថាការប្រកាសខ្លួនជាប្រធានាធិបតីរបស់លោក JuanGuaido ស្របតាមមាត្រា២៣៣ នៃរដ្ឋធម្មនុញ្ញវេណេស៊ុយអេឡា ហើយក៏មានការគាំទ្រពីសមាជិករដ្ឋសភាដែលចង់ឲ្យមានការស្ដារលទ្ធិប្រជាធិបតេយ្យឡើងវិញផងដែរ។
តាមរយៈសេចក្តីប្រកាសព័ត៌មានដដែលនេះ សហរដ្ឋអាមេរិក ក៏បានអំពាវឲ្យលោក ម៉ាឌូរ៉ូ ចុះចេញពីដំណែង ដោយថា ប្រជាជនវេណេស៊ុយអេឡារងការឈឺចាប់យូរគ្រប់គ្រាន់ហើយ ក្រោមការគ្រប់គ្រងបែបផ្ដាច់ការរបស់លោក។ អាមេរិកថា ខ្លួនត្រៀមខ្លួនរួចជាស្រេចហើយក្នុងការជួយស្តារលទ្ធិប្រជាធិបតេយ្យនៅវេណេស៊ុយអេឡាឡើងវិញ ក៏ដូចជាការផ្ដល់ជំនួយមនុស្សធម៌នានាដល់ពលរដ្ឋប្រទេសនេះ។
ក្នុងសេចក្តីថ្លែងការណ៍មួយទៀតដែលចេញផ្សាយដោយសេតវិមានកាលពីម្សិលមិញ ប្រធានាធិបតីសហរដ្ឋអាមេរិក លោក ដូណាល់ ត្រាំ ក៏បានអំពាវនាវឲ្យប្រទេសលោកខាងលិចដទៃទៀតទទួលស្គាល់លោក Juan-Guaido ជាប្រធានាធិបតីវេណេស៊ុយអេឡាបណ្ដោះអាសន្នផងដែរ។
ភ្លាមៗក្រោយការទទួលស្គាល់លោក Juan-Guaido ជាប្រធានាធិបតីវេណេស៊ុយអេឡាពីភាគីអាមេរិក លោក ម៉ាឌូរ៉ូ បានប្រកាសថា ជាការកាត់ផ្ដាច់ទំនាក់ទំនងការទួតរវាងប្រទេសទាំងពីរ។ លោក ម៉ាឌូរ៉ូ ទុកពេល៧២ម៉ោងឲ្យបុគ្គលិកទូតអាមេរិកទាំងអស់ចាកចេញពីប្រទេសវេណេស៊ុយអេឡា។ លោក ម៉ាឌូរ៉ូ ថាលោកជាប្រធានាធិបតីតែមួយគត់របស់ប្រទេសអាមេរិកឡាទីនមួយនេះ។ លោក បន្ថែមថា វេណេស៊ុយអេឡា មិនចង់ត្រលប់ទៅសតវត្សទី២០ ដែលក្រុមជនបរទេសនិយាយភាសាអង់គ្លេសធ្វើអន្តរាគមន៍ និងធ្វើរដ្ឋប្រហារទម្លាក់មេដឹកនាំនានានៅអាមេរិកឡាទីនននោះទេ។
ទោះជាយ៉ាងណាក៏ដោយក្នុងសេចក្តីថ្លែងការណ៍ដាច់ដោយឡែកមួយទៀតរបស់ក្រសួងការបរទេសអាមេរិកចេញផ្សាយកាលពីម្សិលមិញ អាមេរិកថាខ្លួនមិនផ្តាច់ទំនាក់ទំនងការទូតជាមួយវេណេស៊ុយអេឡាទេ។ អាមេរិក លើកឡើងថា លោក ម៉ាឌូរ៉ូ លែងជាប្រធានាធិបតីស្របច្បាប់ទៀតហើយ ដូច្នេះលោកគ្មានសិទ្ធិកាត់ផ្ដាច់ទំនាក់ទំនងការទូតរវាងប្រទេសទាំងពីរឡើយ។ ប្រភពដដែលឲ្យដឹងថា អាមេរិកនឹងនៅតែរក្សាទំនាក់ទំនងជាធម្មតាជាមួយវេណេស៊ុយអេឡាតាមរយៈរដ្ឋាភិបាលរបស់លោក Juan-Guaido ប្រធានាធិបតីបណ្ដោះអាសន្នរបស់ប្រទេសនេះ។
គិតមកត្រឹមព្រឹកថ្ងៃទី២៤ ខែមករា ឆ្នាំ២០១៩នេះ សម្ព័នមិត្តអាមេរិកជិត១០ប្រទេស បានប្រកាសគាំទ្រលោក Juan-Guaido ជាប្រធានាធិបតីវេណេស៊ុយអេឡា។ ប្រទេសទាំងនោះរួមមានកាណាដា ប្រេស៊ីល ប៉េរូ អាហ្សង់ទីន ប៉ារ៉ាហ្កាយ កូស្តារីកា និងអេក្វាទ័រជាដើម។ ដោយឡែកសហភាពអឺរ៉ុប បើទោះជាមិនបានទទួលស្គាល់លោក Juan-Guaido ជាប្រធានាធិបតីដោយត្រង់យ៉ាងណាក្តី ប៉ុន្តែក្នុងសេចក្តីប្រកាសព័ត៌មានចេញកាលពីម្សិលមិញសហភាពអឺរ៉ុប បានប្រកាសគាំទ្រទាំងស្រុងនូវសកម្មភាពរបស់រដ្ឋសភាវេណេស៊ុយអេឡា។
ទោះយ៉ាងណាក៏ដោយ ប្រទេសមួយចំនួនរួមមាន គុយបា បូលីវៀ តួកគី និងរុស្ស៊ី បានចេញមុខការពារភាពជាប្រធានាធិបតីស្របច្បាប់របស់លោក ម៉ាឌូរ៉ូ ហើយថ្កោលទោសអាមេរិកថាបានរំលោភអធិបតេយ្យភាព កិច្ចការផ្ទៃក្នុងវេណេស៊ុយអេឡា និងបំពានច្បាប់អន្តរជាតិទៀតផង៕