សកម្មជនគាំទ្រចលនាប្រជាធិបតេយ្យមួយរូបសញ្ជាតិអូស្ត្រាលីដើមកំណើតវៀតណាម ត្រូវអាជ្ញាធរទីក្រុងហាណូយចាប់ខ្លួន នៅពេលធ្វើដំណើរទៅស្រុកកំណើត។
តាមទីភ្នាក់ងារសារព័ត៌មាន AFP បានដកស្រង់សម្តីរបស់លោក Phong Nguyen ជាមិត្តរបស់លោក Chau Van Kham ថា មិត្តរបស់លោកធ្វើដំណើរទៅវៀតណាមពេលនេះគឺជាបេសកកម្មស្វែងរកការពិតមួយទាក់ទងស្ថានភាពសិទ្ធិសេរីភាពរបស់ប្រជាពលរដ្ឋ។
លោក Chau Van Kham និងលោក Phong Nguyen គឺជាក្រុមដែលប្រឆាំងរដ្ឋាភិបាលវៀតណាម ហើយរដ្ឋអំណាចវៀតណាមចាត់ទុកក្រុមនេះថា ជាក្រុមភេរវកម្មបង្កហិង្សាចង់ផ្តួលរំលំរដ្ឋាភិបាល។
តាមប្រភពពីក្រុមគ្រួសារ និងសហការីបញ្ជាក់ថា លោក Chau Van Kham ត្រូវអាជ្ញាធរវៀតណាមចាប់ខ្លួនកាលពីថ្ងៃទី១៣ ខែមករា កន្លងទៅនេះ។
វៀតណាមគឺប្រទេសគ្រប់គ្រងដោយបក្សតែមួយ ហើយរងការចោទប្រកាន់ថា មានការរឹតបន្តឹងទៅលើសិទ្ធិសេរីភាពផ្សេងៗ។
អង្គការ Freedom House គឺជាអង្គការឃ្លាំមើលសិទ្ធិមនុស្សមួយ បានចាត់ថ្នាក់វៀតណាមថា ជាប្រទេសមិនមានសេរីភាព។
អង្គការឃ្លាំមើលសិទ្ធិមនុស្សអន្តរជាតិបានរកឃើញថា ក្នុងឆ្នាំ២០១៨ វៀតណាមបានបង្រ្កាបច្រើនលើការប្រើប្រាស់សិទ្ធិសេរីភាពរបស់ប្រជាពលរដ្ឋ។ អង្គការនេះរកឃើញថា ក្នុងឆ្នាំ២០១៨ វៀតណាមកាត់ទោសអ្នកដែលបញ្ចេញមតិយោបល់ចំនួន៤២នាក់ដែលបានរិះគន់រដ្ឋាភិបាល។
