មេដឹកនាំគណបក្សប្រឆាំងនៅវេណេស៊ុយអេឡា លោក Juan Guaido ដែលប្រកាសខ្លួនឯងថា ជាប្រធានាធិបតីបណ្តោះអាសន្ននោះបានថ្លែងថា លោកកំពុងតែពិចារណាក្នុងការលើកលែងទោសដល់ប្រធានាធិបតីបច្ចុប្បន្នលោក Maduro។
លោក Juan Guaido ថ្លែងថា ពេលនេះលោកកំពុងតែខិតខំក្នុងការទំនាក់ទំនងជាមួយភាគីពាក់ព័ន្ធទាំងអស់ ដើម្បីចរចាបញ្ចប់វិបត្តិនយោបាយ។ នេះបើតាមសារព័ត៌មាន BBC។
ការប្រកាសនេះធ្វើឡើងស្របពេលដែលសហរដ្ឋអាមេរិកបានប្រកាសប្រឆាំងលោក Maduro ហើយប្រធានាធិបតីវេណេស៊ុយអេឡារូបនេះ ប្រកាសកាត់ផ្តាច់ទំនាក់ទំនងជាមួយអាមេរិក។
បច្ចុប្បន្នសហគមន៍អន្តរជាតិបានបែងចែកជាពីរក្រុមក្នុងការទទួលស្គាល់រដ្ឋាភិបាលវេណេស៊ុយអេឡា។ បន្ទាប់ពីព្រឹត្តិការណ៍កាលពីថ្ងៃពុធ សមាជិកសភាប្រទេសនេះសម្រេចជ្រើសរើស មេបក្សប្រឆាំងជាប្រធានាធិបតី។
ដឹកមុខដោយសហរដ្ឋអាមេរិក ប្រទេសនៅអាមេរិកឡាទីន រួមទាំងកាណាដា និងអង់គ្លេសប្រកាសគាំទ្រមេបក្សប្រឆាំងជាប្រធានាធិបតី។
ចំណែករុស្ស៊ីចេញមុខថ្កោលទោសចំពោះអន្តរជាតិដែលគាំទ្រមេបក្សប្រឆាំងជាប្រធានាធិបតីនេះថា ជាផ្លូវរុញឲ្យប្រទេសនេះធ្លាក់ក្នុងវិបត្តិបង្ហូរឈាម។ ចិន ម៉ិចស៊ិក និងតួកគី គាំទ្រលោក Maduro។
រដ្ឋមន្ត្រីការបរទេសសហរដ្ឋអាមេរិក Mike Pompeo បានអំពាវនាវសុំឲ្យក្រុមប្រឹក្សាសន្តិសុខនៃអង្គការសហប្រជាជាតិកោះប្រជុំរឿងវិបត្តិនៅវេណេស៊ុយអេឡានៅថ្ងៃសៅរ៍ស្អែកនេះ។