រដ្ឋាភិបាលកម្ពុជាបានប្រកាសថា ប្រព័ន្ធត្រួតពិនិត្យស្វ័យប្រវត្តិមួយ នឹងត្រូវដាក់ពង្រាយនៅតាមច្រកទ្វារអន្តរជាតិនៃព្រលានយន្តហោះនៅក្នុងប្រទេសកម្ពុជា ដោយថា ដើម្បីសម្រួលដល់ការធ្វើដំណើររបស់ប្រជាពលរដ្ឋ។
ក្នុងលិខិតមួយកាលពីថ្ងៃសុក្រកន្លងមកនេះ រដ្ឋលេខាធិការក្រសួងការបរទេសកម្ពុជា លោក ស៊ា កុសល បានប្រាប់ទៅមន្ត្រីទូតកម្ពុជាទាំងអស់ថា ក្រសួងមហាផ្ទៃនឹងដាក់ឲ្យដំណើរការនូវច្រកទ្វារអេឡិកត្រូនិចនាពេលឆាប់ៗខាងមុខ។
បើតាមលិខិតដដែលនោះ ប្រព័ន្ធទ្វារស្វ័យប្រវត្តិនេះ នឹងត្រូវដាក់ឲ្យដំណើរការនៅច្រកទ្វារនៃព្រលានយន្តហោះអន្តរជាតិភ្នំពេញ និងព្រលានយន្តហោះអន្តរជាតិនៅខេត្តសៀមរាប។
ជាមួយប្រព័ន្ធបច្ចេកវិទ្យានេះ ក្រសួងការបរទេសប្រាប់ទៅមន្ត្រីការទូតរបស់ខ្លួនថា ពលរដ្ឋកម្ពុជាដែលនឹងធ្វើដំណើរចេញចូលតាមច្រកទ្វារនៃព្រលានយន្តហោះទាំងពីរ នឹងមិនតម្រូវឲ្យបោះត្រាចេញ-ចូលនៅលើលិខិតឆ្លងដែនអេឡិកត្រូនិចទៀតឡើយ។
ក្រសួងការបរទេស បានអះអាងថា ការដាក់ឲ្យដំណើរការប្រព័ន្ធ E-gates នេះ គឺដើម្បីបង្កលក្ខណៈងាយស្រួលសម្រាប់ការចេញ-ចូលច្រកទ្វារអន្ដរជាតិរបស់ពលរដ្ឋ៕