កងកម្លាំងយោធានៅក្នុងប្រទេស បានបង្ហាញជំហរគាំទ្ររដ្ឋាភិបាលដឹកនាំដោយលោកនាយករដ្ឋមន្ដ្រី ហ៊ុន សែន ដែលគំរាមកម្ទេចអតីតមេដឹកនាំអតីតបក្សប្រឆាំងនៅក្រៅប្រទេស លោក សម រង្ស៊ី ឬក្រុមប្រឆាំងរដ្ឋាភិបាល។
តាមរយៈបណ្ដាញសង្គមហ្វេសប៊ុក កាលពីថ្ងៃទី២៥ មករាកន្លងមកនេះ ប្រធានស្ដីទីគណបក្សសង្គ្រោះជាតិ លោក សម រង្ស៊ី បានប្រកាសអំពីគម្រោងធ្វើមាតុភូមិនិវត្តន៍នាពេលខាងមុខ ដោយថា អាចមានប្រជាពលរដ្ឋ អ្នកស្នេហាលទ្ធិប្រជាធិបតេយ្យ និងអ្នកគាំទ្រជាច្រើននាក់ ត្រៀមទៅទទួលរូបលោក។
លោក សម រង្ស៊ី ក៏បានអំពាវនាវទៅកងកម្លាំងប្រដាប់អាវុធ កុំឲ្យស្ដាប់តាមបញ្ជាលោក ហ៊ុន សែន និងកុំបាញ់ប្រជាពលរដ្ឋស្លូតត្រង់ និងជំរុញពួកគេឲ្យឈរខាងប្រជាពលរដ្ឋ ដើម្បីទាមទារសេរីភាព និងយុត្តិធម៌។
ប៉ុន្ដែ ភ្លាមៗក្រោយពីលោក សម រង្ស៊ី ប្រកាសអំពីគម្រោងធ្វើមាតុភូមិនិវត្តន៍ និងអំពាវនាវឲ្យកងកម្លាំងប្រដាប់អាវុធកុំស្ដាប់តាមបញ្ជារដ្ឋាភិបាលដឹកនាំដោយបក្សកាន់អំណាចនោះ ក្រសួងការពារជាតិ មន្ដ្រីជាន់ខ្ពស់កងទ័ពជើងទឹក និងជើងគោក និងកងកម្លាំងយោធាជាច្រើនទៀត បានប្រកាសត្រៀមកម្ទេចក្រុមប្រឆាំងនឹងរដ្ឋាភិបាល និងការអំពាវនាវរបស់លោក សម រង្ស៊ី។
ក្រុមមេដឹកនាំកងទ័ពបានសម្ដែងជំហរគាំទ្ររបស់ពួកគេតាមរយៈសេចក្ដីថ្លែងការណ៍ឬកិច្ចសម្ភាសនានាដែលត្រូវបានចុះផ្សាយជាបន្តបន្ទាប់ដោយសារព័ត៌មានស្និទនឹងរដ្ឋាភិបាល Fresh News។
ក្នុងសេចក្ដីថ្លែងការណ៍មួយកាលពីថ្ងៃម្សិលមិញនេះ អ្នកនាំពាក្យក្រសួងការពារជាតិ បានថ្លែងថា៖ «កងយោធពលខេមរភូមិន្ទ ត្រៀមខ្លួនរួចជាស្រេចហើយ ដើម្បីអនុវត្តនូវដីការបស់តុលាការនៃព្រះរាជាណាចក្រកម្ពុជាក្នុងការចាត់វិធានការចំពោះជនដែលតុលាការតាមចាប់ខ្លួន»។
បន្ទាប់ពីក្រសួងការពារចេញសេចក្ដីថ្លែងការណ៍បែបនេះ បញ្ជាការដ្ឋានផ្សេងៗនៃកងទ័ព ត្រូវបានដកស្រង់សម្ដីដោយសារព័ត៌មាន Fresh News ដែលចុះផ្សាយថា ពួកគេសុទ្ធតែថ្កោលទោស និងប្រឆាំងដាច់ខាតចំពោះអតីតមេដឹកនាំបក្សប្រឆាំង លោក សម រង្ស៊ី ដែលកំពុងរស់និរទេសខ្លួនឯងនៅឯបរទេស។
ការប្រកាសជំហររបស់កងទ័ពជាតិនេះ ធ្វើឡើងក្រោយពេលអតីតគណបក្សប្រឆាំងអំនាវពាវឲ្យពលរដ្ឋ និងកងកម្លាំងយោធាក្រោកឈរឡើងប្រឆាំងរដ្ឋាភិបាលដឹកនាំដោយគណបក្សប្រជាជនកម្ពុជា ដែលបានកើតក្រោយការបោះឆ្នោតថ្នាក់ជាតិដ៏ចម្រូងចម្រាស់មួយ និងការរិះគន់ពីក្រុមប្រទេសលោកសេរី។
ក្នុងពិធីប្រារព្ធខួប ២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ កាលពីថ្ងៃទី២៤មករា ក្រោយពីបញ្ចប់ដំណើរទស្សនកិច្ចទៅប្រទេសចិននោះ លោកហ៊ុន សែន បានថ្លែងក្រើនរំលឹកឲ្យកងកម្លាំងយោធាការពាររដ្ឋាភិបាលរបស់លោក អធិបតេយ្យភាព បូរណភាព និងប្រឆាំងការជ្រៀតជ្រែកពីប្រទេស។
ជាងនេះទៅទៀត លោក ហ៊ុន សែន ក៏បានគំរាមកម្ទេចចោលកងទ័ពណាដែលលោកហៅថា ទ័ពប្រឆាំងនឹងរដ្ឋាភិបាលផងដែរ។
អង្គការឃ្លាំមើលសិទ្ធិមនុស្ស Human Rights Watch បានលើកឡើងនៅក្នុងរបាយការណ៍របស់ខ្លួនកាលពីដើមឆ្នាំ២០១៥ថា ស្ថិតក្នុងអំណាចជាង ៣ទសវត្សរ៍ លោកនាយករដ្ឋមន្ត្រី ហ៊ុន សែន តែងតែប្រើប្រាស់ម្ដងហើយម្ដងទៀតនូវអំពើហិង្សានយោបាយ ការបង្ក្រាប និងអំពើពុករលួយ ដើម្បីរក្សាអំណាច។
Human Rights Watch បានចាត់ថ្នាក់លោក ហ៊ុន សែន គឺជាមេដឹកនាំកាន់អំណាចយូរជាងគេបំផុតលំដាប់ទី៦ នៅក្នុងចំណោមមេដឹកនាំកាន់អំណាចយូរបំផុតនៅលើពិភពលោក ដោយស្ថិតនៅពីក្រោយមេដឹកនាំផ្ដាច់ការហ្ស៊ីបាវ៉េ លោក រ៉ូប៊ឺត មូហ្គាបេ ដែលត្រូវបានពួកយោធាទម្លាក់ពីអំណាចកាលពីចុងឆ្នាំ២០១៧កន្លងមក៕
