រដ្ឋាភិបាលក្រុងប៉េកាំង បានចេញមុខជំទាស់ទៅនឹងការចាត់វិធានការជាឯកតោភាគីណាមួយប្រឆាំងប្រទេសវេណេស៊ុយអេឡា ក្រោយពីសហរដ្ឋអាមេរិកបានទណ្ឌកម្មលើក្រុមហ៊ុនប្រេងរបស់រដ្ឋអាមេរិកឡាទីនមួយនេះ។
អ្នកនាំពាក្យក្រសួងការបរទេសចិន លោក Geng Shuang បានថ្លែងក្នុងសន្និសីទសារព័ត៌មានប្រចាំថ្ងៃនាទីក្រុងប៉េកាំងកាលពីម្សិលមិញថា ចិន ប្តេជ្ញារក្សាគោលការណ៍មិនជ្រៀតជ្រែកកិច្ចការផ្ទៃក្នុងប្រទេសដទៃ។ លោក ជឿជាក់ថា ស្ថានការណ៍ក្នុងប្រទេសវេណេស៊ុយអេឡា គឺត្រូវតែកំណត់ដោយពលរដ្ឋវេណេស៊ុយអេឡា ហើយចិនជំទាស់រាល់ការដាក់ទណ្ឌកម្មជាឯកតោភាគីណាមួយលើប្រទេសនេះ។
អ្នកនាំពាក្យក្រសួងការបរទេសចិនរូបនេះ បន្ថែមថា ប្រវត្តិសាស្រ្តបានបង្រៀនហើយថា ការជ្រៀតជ្រែកពីខាងក្រៅ ឬ ការដាក់ទណ្ឌកម្ម មិនបានជួយដោះស្រាយបញ្ហាទេ តែវាជាការបន្ថែមបន្ទុកទៅវិញ។ លោក Geng Shuang បន្តថា ការដាក់ទណ្ឌកម្មរបស់ប្រទេសណាមួយប្រឆាំងវេណេស៊ុយអេឡា នឹងជះឥទ្ធិពលជាអវិជ្ជមានដល់សុខមាលភាពពលរដ្ឋប្រទេសនេះ ហើយប្រទេសទាំងនោះត្រូវទទួលខុសត្រូវលើអ្វីដែលខ្លួនបានធ្វើ។
សហរដ្ឋអាមេរិកកាលពីថ្ងៃទី២៨ ខែមករា កន្លងទៅ បានដាក់ទណ្ឌកម្មប្រឆាំងនឹងក្រុមហ៊ុនប្រេងរបស់វេណេស៊ុយអេឡា ឈ្មោះ PDVSA។ PDVSA ជាក្រុមហ៊ុនរដ្ឋតែមួយគត់របស់ប្រទេសនេះដែលទទួលខុសត្រូវក្នុងការនាំចេញប្រេងទៅបរទេស។ ការដាក់ទណ្ឌនេះ ជាផ្នែកមួយដែលសហរដ្ឋអាមេរិកធ្វើក្នុងការជំរុញឲ្យមេដឹកនាំវេណេស៊ុយអេឡា លោក ម៉ាឌូរ៉ូ ចុះចេញពីដំណែង។ ទណ្ឌកម្មនេះ នឹងរារាំងក្រុមហ៊ុន PDVSA មិនអាចនាំចូលប្រេងមកសហរដ្ឋអាមេរិកបានទៀតទេ។
កាលពីថ្ងៃទី២១ ខែឧសភា ឆ្នាំ ២០១៨ សហរដ្ឋអាមេរិកបានចេញសេចក្តីសម្រេចមួយដោយហាមមិនឲ្យក្រុមហ៊ុននិងប្រជាជនអាមេរិកទិញហ៊ុនរបស់ក្រុមហ៊ុនប្រេង PDVSA។
ការដាក់ទណ្ឌកម្មទាំងនេះ មានគោលបំណងដើម្បីបិទផ្លូវការប្រព្រឹត្តិអំពើពុករលួយរបស់លោក ម៉ាឌូរ៉ូ និងបក្សពួកខ្លួនដែលយកក្រុមហ៊ុននេះដើម្បីបម្រើប្រយោជន៍។ សហរដ្ឋអាមេរិក ថាលោក ម៉ាឌូរ៉ូ បានប្រើប្រាស់ក្រុមហ៊ុន PDVSA ដើម្បីចិញ្ចឹមក្រុមយោធាក្នុងការរក្សាអំណាចរបស់ខ្លួន។
តាមការចុះផ្សាយរបស់សាព័ត៌មាន Fox News ចំណូលពីការលក់ប្រេងរបស់វេណេស៊ុយអេឡាពឹងផ្អែកយ៉ាងខ្លាំងលើអាមេរិក ព្រោះប្រេង៤១ភាគរយត្រូវបាននាំចេញទៅអាមេរិក។ ចំណែកឯប្រេងដែលនាំទៅចិន និងរុស្ស៊ី មិនបានផ្ដល់ជាចំណូលដល់ប្រទេសនេះទេ ព្រោះថាវាជាបំណុលដែលត្រូវសងត្រលប់ទៅវិញ ដោយសារ វេណេស៊ុយអេឡាជំពាក់ប្រទេសទាំងពីរនេះរាប់ពាន់លានដុល្លារ៕