មេដឹកនាំប្រទេសវេណេស៊ុយអេឡា លោក នីកូឡាស់ ម៉ាឌូរ៉ូ អះអាងថា គ្មានសម្ពាធណាមួយដែលអាចទម្លាក់លោកពីតំណែងបានឡើយ ព្រោះថា លោកមានក្រុមយោធាដែលស្មោះស្ម័គ្រនៅជាមួយ។
លោក ម៉ាឌូរ៉ូ បានថ្លែងបែបនេះតាមកញ្ចក់ទូរទស្សន៍រដ្ឋរបស់ប្រទេសវេណេស៊ុយអេឡាកាលពីថ្ងៃពុធម្សិលមិញ ខណៈពេលដែលលោក Juan Guaidó មេដឹកនាំក្រុមប្រឆាំងធ្វើបាតុកម្មទាមទារឲ្យលោកចុះចេញពីដំណែង។ តាមរយៈវីអូឃ្លីបនោះ លោក ម៉ាឌូរ៉ូ បានបង្ហាញសកម្មភាពរបស់លោកនៅជាមួយក្រុមយោធា។ លោក ម៉ាឌូរ៉ូ ក៏បានព្រមានទៅអាមេរិកផងដែរថា វេណេស៊ុយអេឡានឹងធ្វើដូចវៀតណាម ប្រសិនបើយោធាអាមេរិកលូកដៃចូលជួយក្រុមប្រឆាំងនោះ។
ហេតុអ្វី បានជាក្រុមយោធានៅតែមានភក្តីភាពជាមួយលោក ម៉ាឌូរ៉ូ?
ក្រុមអ្នកជំនាញយោធា និងអ្នកឃ្លាំមើលស្ថានការណ៍ប្រទេសវេណេស៊ុយអេឡាមួយចំនួនផ្ដល់ហេតុផលស្រដៀងគ្នាទាក់ទងនឹងមូលហេតុដែលក្រុមយោធានៅតែស្មោះស្ម័គ្រជាមួយលោក ម៉ាឌូរ៉ូ។
អ្នកវិភាគជាន់ខ្ពស់នៃអង្គការវិបត្តិអន្តរជាតិ (International Crisis Group) លោក Phil Gunson មានប្រសាសន៍ប្រាប់សារព័ត៌មាន BBC របស់អង់គ្លេស ថា លោក ម៉ាឌូរ៉ូ បានប្រើយុទ្ធសាស្រ្តផ្ដល់ជាដំណែងដល់ក្រុមមេទ័ពធំៗជារដ្ឋមន្រ្តី ឬ ដំណែងដែលមានឥទ្ធិពលផ្សេងទៀត។ លោកថា ពីមុនក្រុមយោធាទាំងនោះនៅតែក្នុងបន្ទាយប៉ុណ្ណោះ។
លោកស្ រីSan Miguel អ្នកជំនាញបញ្ហាយោធាវេណេស៊ុយអេឡា បានថ្លែងប្រាប់សារព័ត៌មានFinancial Times ថា ដើម្បីទទួលបានភក្តីភាពពីក្រុមយោធា លោក ម៉ាឌូរ៉ូ បានធ្វើការដំឡើងឋានន្តរសក្តិរបស់ពួកគេ។ លោកស្រី បន្តថា ចាប់តាំងឡើងកាន់អំណាចមក មេដឹកនាំរូបនេះ បានបង្កើនចំនួនឧត្តមសេនីយ៍រហូតដល់១២០០នាក់ ដែលច្រើនជាងនៅអាមេរិកប្រហែលពីរដង។
ក្រៅពីការផ្ដល់អំណាច លោក ម៉ាឌូរ៉ូ ក៏បានផ្ដល់ផលប្រយោជន៍ខាងផ្នែកហិរញ្ញវត្ថុយ៉ាងច្រើនសន្ធឹកសន្ធាប់ដល់ក្រុមមេទ័ពធំៗទាំងនោះផងដែរ។ លោកស្រី San Miguel ថា ពួកគេត្រួវបានលោក ម៉ាឌូរ៉ូ រៀបចំឲ្យកាន់កាប់វិស័យដែលអាចរកចំណូលបានច្រើនដូចជា ប្រេង រ៉ែ និងការនាំចូលម្ហូបអាហារជាដើម។ ជាក់ស្តែងក្រុមហ៊ុនប្រេងរដ្ឋ PDVSA ស្ថិតក្រោមការគ្រប់គ្រងរបស់ប្រមុខសន្តិជាតិ ឧត្តមសេនីយ៍ Manuel Quevedo។ ចំណែកឯជំនួញធំៗទាក់ទងនឹងអាហារនិងគ្រឿងបរិភោគ ត្រូវបានកាន់កាប់ដោយរដ្ឋមន្រ្តីក្រសួងការពារជាតិ លោក Vladimir Padrino។
អ្នកជំនាញសន្តិសុខនៃសាកលវិទ្យាល័យ Florida International លោក Brian Fonseca ត្រូវបានសារព័ត៌មាន BBC របស់អង់គ្លេសដកស្រង់សម្តីថា លោក ម៉ាឌូរ៉ូ បានទាក់ទាញក្រុមយោធាទាំងនោះឲ្យនៅជាមួយខ្លួនតាមរយៈការបើកដៃឲ្យពួកគេប្រព្រឹត្តអំពើពុករលួយ។
អ្នកវិភាគជាន់ខ្ពស់នៃអង្គការវិបត្តិអន្តរជាតិ (International Crisis Group) លោក Phil Gunson បានឲ្យដឹងបន្ថែមថា ក្រុមមេទ័ពក៏មានការព្រួយបារម្ភថា ពួកគេអាចនឹងមានទោស ប្រសិនបើលោក ម៉ាឌូរ៉ូ អស់អំណាចទៅ។
ទោះយ៉ាងណាក៏ដោយ ក្រុមប្រឆាំងដែលដឹកនាំដោយលោក Juan Guaidó បានធ្វើការធានាដល់ក្រុមយោធា ថាពួកគេនឹងមិនត្រូវបានដាក់ទោសទណ្ឌអ្វីនោះទេ។ ក្រុមលោក Juan Guaidó កាលពីថ្ងៃទី២៨ ខែមករា បាននាំគ្នីគ្នាទៅកាន់មូលដ្ឋានរបស់ក្រុមយោធា។ ក្រុមប្រឆាំងបានហុចលិខិតដែលធានាការលើកលែងទោសដល់ក្រុមយោធា តែលិខិតនោះត្រូវបានទាហានម្នាក់ទទួលយក ហើយដុតចោលនៅនឹងមុខតែម្តង៕
