សភាអឺរ៉ុប អំពាវនាវឲ្យប្រទេសជាសមាជិកក្នុងសហភាពមួយនេះទទួលស្គាល់មេដឹកនាំបក្សប្រឆាំងលោក Juan Guaidó ជាប្រធានាធិបតីវេណេស៊ុយអេឡាបណ្ដោះអាសន្ន ជំនួសលោក ម៉ាឌូរ៉ូ រហូតដល់មានការបោះឆ្នោតថ្មី។
យោងតាមសេចក្តីប្រកាសព័ត៌មានដែលចេញផ្សាយកាលពីថ្ងៃព្រហស្បតិ៍ម្សិលមិញ សភាអឺរ៉ុប បានប្រកាសទទួលស្គាល់លោក Juan Guaidó ជាប្រធានាធិបតីស្របច្បាប់បណ្តោះអាសន្ន ដោយថា ការឡើងកាន់ដំណែងរបស់លោកធ្វើឡើងស្របតាមរដ្ឋធម្មនុញ្ញវេណេស៊ុយអេឡា។ ប្រភពដដែលឲ្យដឹងបន្ថែមថា សហភាពអឺរ៉ុប និងប្រទេសជាសមាជិកនឹងទទួលស្គាល់តែតំណាងរដ្ឋាភិបាលវេណេស៊ុយអេឡាណាដែលត្រូវបានតែងតាំងដោយមេដឹកនាំស្របច្បាប់ ពោលគឺក្រុមលោក Juan Guaidó តែប៉ុណ្ណោះ។
សភាអឺរ៉ុប បានថ្កោលទោសផងដែរចំពោះអាជ្ញាធររបស់លោក ម៉ាឌូរ៉ូ ដែលបានគាបសង្កត់និងប្រើហិង្សាទៅលើប្រជាពលរដ្ឋខ្លួន បណ្ដាលឲ្យមានទាំងអ្នកស្លាប់ និងរបួសជាច្រើននាក់។ សភាអឺរ៉ុប ក៏បានបង្ហាញជំហគាំទ្រការអំពាវនាវរបស់អង្គការសហប្រជាជាតិដែលស្នើឲ្យមានការស៊ើបអង្កេតលើករណីនេះ។
ឧត្តមស្នងការអង្គការសហប្រជាជាតិទទួលបន្ទុកសិទិ្ធមនុស្ស លោកស្រី Michelle Bachelet កាលពីថ្ងៃទី២៤ ខែមករា ឆ្នាំ ២០១៩ បានអំពាវឲ្យមានការបង្កើតក្រុមការងារស៊ើបអង្កេតឯករាជ្យមួយករណីបង្រ្កាបដោយហិង្សាលើក្រុមបាតុករដែលដឹកនាំលោក Juan Guaidó។ លោកស្រី បានលើកឡើងក្នុងកិច្ចប្រជុំដែលធ្វើឡើងនៅក្រុងសឺណែវ ប្រទេសស្វីស ថាមនុស្សយ៉ាងតិច២០នាក់បានស្លាប់ដោយសារបង្រ្កាបក្នុងអំឡុងពេលបាតុកម្មកាលពីថ្ងៃទី២៣ ខែមករា ឆ្នាំ២០១៩។
សភាអឺរ៉ុប ក៏បានរិះគន់ក្រុមលោក ម៉ាឌូរ៉ូ ផងដែរជុំវិញការចាប់ឃុំខ្លួនអ្នកសារព័ត៌មានដែលក្នុងនោះក៏មានមកពីអឺរ៉ុបផងដែ។ ក្រុមសមាជិកសភាសហភាពនេះ បានអំពាវឲ្យដោះលែងអ្នកទាំងនោះជាបន្ទាន់។
លោក Juan Guaido បានប្រកាសខ្លួនជាប្រធានាធិបតីរដ្ឋាភិបាលអន្តរកាលជាបណ្ដោះអាសន្ន ក្នុងអំឡុងពេលដែលលោកដឹកនាំបាតុកម្មទាមទារឲ្យលោក ម៉ាឌូរ៉ូ ចុះចេញពីដំណែង កាលពីថ្ងៃទី២៣ ខែមករា ឆ្នាំ២០១៩។ ភ្លាមៗសហរដ្ឋអាមេរិក និងប្រទេសជាសម្ព័ន្ធមិត្តរបស់ខ្លួនមានដូចជា កាណាដា ប្រេស៊ីល ប៉េរូ អាហ្សង់ទីន ប៉ារ៉ាហ្កាយ កូស្តារីកា និងអេក្វាទ័រ ជាដើម បានប្រកាសគាំទ្រ និងទទួលស្គាល់លោក Juan Guaido។
ដោយឡែកសហភាពអឺរ៉ុប មិនបានទទួលស្គាល់លោក Juan-Guaido ជាប្រធានាធិបតីភ្លាមៗនោះទេ។ ប៉ុន្តែក្នុងសេចក្តីប្រកាសព័ត៌មានចេញកាលថ្ងៃទី២៣ខែមករាឆ្នាំ២០១៩ សហភាពនេះ បានប្រកាសគាំទ្រទាំងស្រុងនូវសកម្មភាពរបស់រដ្ឋសភាវេណេស៊ុយអេឡា និងលោក Juan Guaido៕
