ចំនួនភ្ញៀវទេសចរបរទេសទៅលេងវៀតណាមកើនឡើងចំនួន៥ភាគរយនៅក្នុងខែមករាឆ្នាំ២០១៩ ដែលភាគច្រើនពួកគេមកពីសហរដ្ឋអាមេរិក និងសហភាពអឺរ៉ុប។
ទីភ្នាក់ងារព័ត៌មានវៀតណាមបានដកស្រង់របាយការណ៍ពីការិយាល័យទិន្នន័យទូទៅរបស់រដ្ឋាភិបាលចុះផ្សាយកាលពីម្សិលមិញថា ភ្ញៀវទេសចរបរទេសបានជ្រើសរើសប្រទេសវៀតណាមជាគោលដៅនៅក្នុងខែមករានេះ មានជាង១,៥លាននាក់ ចំនួននេះកើនឡើង៥ភាគរយបើប្រៀបធៀបរយៈពេលដូចគ្នាកាលពីឆ្នាំមុន។ ប្រភពដដែលបញ្ជាក់ថា ភ្ញៀវទាំងនេះច្រើនលើសលប់ពីសហរដ្ឋអាមេរិក និងអឺរ៉ុប។
ទីភ្នាក់ងារព័ត៌មានវៀតណាមឲ្យដឹងទៀតថា សម្រាប់ទីក្រុងហាណូយវិញគិតទាំងភ្ញៀវទេសចរជាតិ និងអន្តរជាតិ ក្នុងខែមករា ទទួលបាន២,៤លាននាក់ កើនឡើង១០,៤ភាគរយ។