មន្ត្រីនគរបាលបានឲ្យដឹងថា ឡានទឹកជាង ២០គ្រឿង ត្រូវបានដាក់ពង្រាយដើម្បីត្រៀមបង្ក្រាបអគ្គិភ័យ ខណៈដែលអាជ្ញាធររាជធានីភ្នំពេញក៏បានអំពាវនាវដល់ពលរដ្ឋឲ្យប្រុងប្រយ័ត្នចំពោះសន្តិសុខ និងសុវត្ថិភាពផងដែរអំឡុងពិធីបុណ្យចូលឆ្នាំចិន។
ប្រធានអង្គភាពនគរបាលពន្លត់អគ្គិភ័យរាជធានីភ្នំពេញ លោក ព្រំ យ៉ត បានប្រាប់វីអូឌីតាមទូរស័ព្ទនៅថ្ងៃនេះ កម្លាំងពន្លត់អគ្គិភ័យរបស់លោក បានត្រៀមឡានទឹកចំនួន ២៣គ្រឿង នៅតាមគោលដៅសំខាន់ៗ ៨កន្លែង ដើម្បីបង្ការហានិភ័យនានាកើតឡើងជាយថាហេតុនៅក្នុងកំឡុងពិធីប្រពៃណីចិននេះ។
ជាងនេះទៅទៀត អាជ្ញាធររាជធានីភ្នំពេញ បានអំពាវនាវទៅដល់ប្រជាពលរដ្ឋ ឲ្យប្រុងប្រយ័ត្នចំពោះសន្តិសុខ និងសុវត្ថិភាពអំឡុងពេលនៃការប្រារព្ធពិធីបុណ្យចូលឆ្នាំថ្មីប្រពៃណីចិន-វៀតណាម។
សាលារាជធានីភ្នំពេញ បានលើកឡើងក្នុងសេចក្ដីជូនដំណឹងកាលពីថ្ងៃទី២៩មករាកន្លងមកនេះថា ដើម្បីរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ អាជ្ញាធរបានហាមឃាត់ប្រជាពលរដ្ឋ មិនឲ្យដុតកាំជ្រួច អុចផាវ លេងល្បែងស៊ីសងគ្រប់ប្រភេទ និងការហែក្បួនសាសនានានាដែលគ្មានការអនុញាតនោះឡើយ៕