លោក នីកូឡាស់ ម៉ាឌូរ៉ូ បញ្ជាក់ថា លោកចង់និយាយទល់មុខគ្នាជាមួយមេដឹកនាំបក្សប្រឆាំងដើម្បីកំណត់ពីបញ្ហារបស់វេណេស៊ុយអេឡា និងស្វែងរកដំណោះស្រាយដែលសមស្របមួយ ប៉ុុន្តែលោកបដិសេធការបោះឆ្នោតប្រធានាធិបតីឡើងវិញ។
លោក ម៉ាឌូរ៉ូ បានលើកឡើងបែបនេះក្នុងបទសម្ភាសន៍ជាមួយអ្នកកាសែតជនជាតិអេស្ប៉ាញ លោក Jordi Évole ដែលត្រូវបានផ្សព្វផ្សាយនៅថ្ងៃអាទិត្យម្សិលមិញ។ លោក ម៉ាឌូរ៉ូ បានថ្លែងបន្តថានយោបាយមិនមែនជាល្បែងក្មេងនោះទេ។ វិទ្យុសម្លេងសហរដ្ឋអាមេរិក បានដកស្រង់សម្តីរបស់លោកបន្តថា មេដឹកនាំក្រុមប្រឆាំងលោក Juan Guaido ត្រូវតែគិតពីអ្វីដែលខ្លួនកំពុងធ្វើ ដោយថាកុំចង់ធ្វើជាប្រធានាធិបតីដោយមិនមាននរណាបោះឆ្នោតឲ្យនោះ។
ក្នុងបទសម្ភាសន៍ដដែលនោះ លោក ម៉ាឌូរ៉ូ ក៏បានបង្ហាញជំហផងដែរថានឹងមិនអនុញ្ញាតឲ្យមានការបោះឆ្នោតឡើងវិញនោះទេ។ លោក បានបន្ថែមថា លោកអាចរៀបចំការបោះឆ្នោតរដ្ឋសភាឡើងវិញបាន ប៉ុន្តែសម្រាប់ការបោះឆ្នោតប្រធានាធិបតីទាល់តែរង់ចាំដល់ឆ្នាំ២០២៤។
លោក ម៉ាឌូរ៉ូ ចង់ឲ្យមានការបោះឆ្នោតរដ្ឋសភា ដោយសារតែរដ្ឋសភារបស់ប្រទេសនេះកំពុងស្ថិតក្រោមការគ្រប់គ្រងរបស់លោក Juan Guaido មេដឹកនាំបក្សប្រឆាំងដែលប្រកាសខ្លួនជាប្រធានាធិបតីវេណេស៊ុយអេឡា បណ្ដោះអាសន្ន។
ការលើកឡើងជាថ្មីរបស់លោក ម៉ាឌូរ៉ូ ដែលចង់ឲ្យមានការចរចារជាមួយមេដឹកបក្សប្រឆាំង ធ្វើឡើង ស្របពេលដែលប្រមុខស្តីទីទ័ពអាកាសវេណេស៊ុយអេឡា ឧត្តមសេនីយ៍ Francisco Yanezប្រកាសគាំទ្រលោក Juan Guaido។
លោក ម៉ាឌូរ៉ូ ក៏បានវាយប្រហារលោក ដូណាល់ ត្រាំផងដែរ។ លោក ម៉ាឌូរ៉ូ ថា បើលោក ត្រាំនៅតែជ្រៀតជ្រែកចង់ឲ្យលោកចុះចាញ់ពីដំណែង នោះលោក ត្រាំ នឹងចាកចេញពីសេតវិមានដោយបាតដៃប្រឡាក់ឈាម។
លោក ម៉ាឌូរ៉ូ ក៏បានបដិសេធផងដែរពីជំនួយមនុស្សធម៌ណាមួយរបស់អាមេរិក។ លោក បានបង្ហាញការព្រួយបារម្ភថាអាមេរិកអាចប្រើការផ្ដល់ជំនួយនេះ ដើម្បីជាលេសឲ្យកងទ័ពខ្លួនចូលទឹកដីវេណេស៊ុយអេឡា។
មេដឹកនាំបក្សប្រឆាំង លោក Juan Guaidoកាលពីម្សិលមិញ បានលើកឡើងថា លោក មានគម្រោងទទួលជំនួយមនុស្សធម៌របស់បណ្ដាប្រទេសផ្សេងៗ ដល់ប្រជាជនវេណេស៊ុយអេឡា ដែលក្នុងនោះក៏មានអាមេរិកផងដែរ។
លោក ត្រាំ ក្នុងបទសម្ភាសន៍ជាមួយសារព័ត៌មានCBS កាលពីថ្ងៃអាទិត្យម្សិលមិញ បានបដិសេធពីការស្នើសុំរបស់ លោកម៉ាឌូរ៉ូ ដែលចង់ជួបរូបលោក។ លោក ត្រាំ បានលើកឡើងផងដែរថាការបញ្ជូនទ័ពចូលធ្វើអន្តរាគមន៍ដើម្បីដោះស្រាយវិបត្តិនៅវេណេស៊ុយអេឡា នៅតែជាជម្រើសមួយសម្រាប់សហរដ្ឋអាមេរិក។
លោក Juan Guaido បានប្រកាសខ្លួនជាប្រធានាធិបតី វេណេស៊ុយអេឡាបណ្ដោះអាសន្ន អំឡុងពេល ដែលលោក ដឹកនាំបាតុកម្មទាមទារឲ្យលោកម៉ាឌូរ៉ូចុះចេញពីដំណែងកាលពីថ្ងៃទី២៣ ខែមករា ឆ្នាំ២០១៩កន្លងទៅ។
លោក ម៉ាឌូរ៉ូ បានជាប់ឆ្នោតជាប្រធានាធិបតីវេណេស៊ុយអេឡាជាថ្មីម្តងទៀតកាលពីខែឧសភា ឆ្នាំ២០១៨កន្លងទៅ។ ប៉ុន្តែការបោះឆ្នោតនេះត្រូវបានក្រុមប្រទេសលោកសេរីមានដូចជាអាមេរិក កាណាដា និង សហគមន៍អឺរ៉ុបជាដើមប្រកាសមិនទទូលស្គាល់ ដោយថាការបោះឆ្នោតនេះមិនមានការចូលរួមពីបក្សប្រឆាំងធំៗ និងមានការទិញដូរសន្លឹកឆ្នោតជាដើម។ ប្រទេសទាំងនោះ ម្តងហើយម្តងទៀតបានអំពាវនាវឲ្យលោក ម៉ាឌូរ៉ូ រៀបចំការបោះឆ្នោតមួយឡើងវិញ ដែលមានដោយភាពសេរី និងយុត្តិធម៌៕