ចាប់តាំងពីរដ្ឋប្រហារយោធាទម្លាក់មេដឹកនាំជាសេដ្ឋីមានប្រជាប្រិយមួយរូបគឺលោក ថាក់ ស៊ីន កាលពីថ្ងៃទី១៩ ខែកញ្ញា ឆ្នាំ២០០៦ ប្រទេសថៃកើតមានវិបត្តិនយោបាយ មានការតវ៉ា ការបង្ក្រាបបង្ហូរឈាម និងដូរមេដឹកនាំបន្តបន្ទាប់។
គិតចាប់ពីឆ្នាំ២០០៦ រហូតដល់ដើមខែកុម្ភៈ ឆ្នាំ២០១៩នេះ មានរយៈពេល១៣ឆ្នាំ ថៃផ្លាស់ប្តូរមេដឹកនាំទាំងស៊ីវិល និងយោធាចំនួន១០រូប គឺបច្ចុប្បន្បន្នកំពុងតែដឹកនាំដោយរបបយោធាដែលមានលោក ប្រយុទ្ធ ចាន់អូចា ជានាយករដ្ឋមន្ត្រី។
អំណាចចំនួន៣ ដែលរុញច្រាន និងរារាំងមិនឲ្យនាយករដ្ឋមន្ត្រីថៃអាចក្រាញអំណាចបានយូរ នៅក្នុងតួនាទីរបស់ខ្លួន រហូតមេដឹកនាំខ្លះស្ថិតនៅក្នុងតំណែងបានតែជាង១០ថ្ងៃតែប៉ុណ្ណោះ។
ពលរដ្ឋសកម្ម
ពលរដ្ឋថៃបានបង្ហាញសកម្មភាពនយោបាយយ៉ាងសកម្មតាមរូបភាពក្រុមអាវលឿង និងក្រុមអាវក្រហម។ ក្រុមអាវក្រហមគាំទ្រនយោបាយរបស់លោក ថាក់ ស៊ីន ចំណែកក្រុមអាវលឿងគាំទ្រពួកយោធា និងខ្សែរាជវង្ស។
ទន្ទឹមក្រុមទាំងពីរពណ៌ធ្វើសកម្មភាព ក៏មានក្រុមផ្សេងទៀតដែលមិនមានពណ៌តែងចេញធ្វើសកម្មភាពជំរុញឲ្យមានការបោះឆ្នោត។
បើនិយាយពីការបោះឆ្នោត គឺក្រោយរដ្ឋប្រហារកាលពីថ្ងៃទី៧ ខែឧសភា ឆ្នាំ២០១៤ ក្រុមយោធាសន្យាបោះឆ្នោតបន្តបន្ទាប់ ហើយលើកពេល៥លើករួចមកហើយ។ ក្រោយការប្រកាសលើកពេលបោះឆ្នោតលើកចុងក្រោយនៅដើមឆ្នាំ២០១៩នេះ ពលរដ្ឋដែលចង់ឲ្យមានការបោះឆ្នោតរាប់រយនាក់ចេញមុខតវ៉ាតាមដងផ្លូវនៅក្នុងទីក្រុងបាងកករាល់សប្តាហ៍ប្រឆាំងការពន្យារពេលនេះ។
ព្រះមហាក្សត្រ
នៅថៃ ព្រះមហាក្សត្រមានឥទ្ធិពលខ្លាំងលើអ្នកនយោបាយក្នុងការដោះស្រាយបញ្ហាធំៗរបស់ជាតិ និងជម្លោះរវាងអ្នកនយោបាយ។ រដ្ឋធម្មនុញ្ញថ្មីដែលបង្កើតឡើងកាលពីឆ្នាំ២០១៧ បានបញ្ជាក់ថា ពេលព្រះមហាក្សត្រអវត្តមានមិននៅក្នុងប្រទេស មិនឲ្យមានប្រមុខរដ្ឋស្តីទី ឬមានអ្នកណាសម្រេចការងារជំនួសព្រះអង្គទេ។
កាលពីឆ្នាំ២០១៥ រដ្ឋាភិបាលចិនបានស្នើជីកដីទៅកាន់ប្រទេសនៅភាគខាងត្បូងថៃ បង្កើតផ្លូវទឹក ដើម្បីងាយស្រូលក្នុងការដឹកទំនិញចំណេញពេលគឺ រដ្ឋាភិបាលមិនហ៊ានសម្រេចទេដោយមិនមានការអនុញ្ញាតពីក្សត្រ។
ចំពោះការសម្រេចលើកពេលបោះឆ្នោត គឺរដ្ឋាភិបាលយោធាលើកពេលការបោះឆ្នោតនៅថ្ងៃទី២៤ ខែកុម្ភៈ ទៅបោះឆ្នោតនៅក្នុងខែឧសភាវិញនោះ ត្រូវព្រះមហាក្សត្រ Maha Vajiralongkorn អន្តរាគមសម្រេចឲ្យបោះឆ្នោតនៅថ្ងៃទី២៤ ខែមីនា។ ការសម្រេចនេះ មិនមានក្រុមណាមួយហ៊ានជំទាស់ទេ សូម្បីតែពួកយោធា។
មេដឹកនាំ
ការប្រកួតប្រជែងរបស់អ្នកនយោបាយផ្តោតសំខាន់លើផលប្រយោជន៍ជាតិ និងការគោរពច្បាប់។ មេដឹកនាំខ្លះទាំងមេទ័ព និងជនស៊ីវិល គឺក្រោយនយោបាយច្របូកច្របល់ ពួកគេឡើងកាន់អំណាចបណ្ណោះអាសន្នរយៈពេលខ្លីៗ ហើយរៀបចំការបោះឆ្នោត បើទោះជាពួកគេមានលទ្ធភាពក្តោបអំណាចក៏ដោយ។
មេដឹកនាំមិនជ្រៀតជ្រែកចូលក្នុងការងារស្ថាប័នរដ្ឋដើម្បីបម្រើឲ្យនយោបាយ ឬ ផលប្រយោជន៍បក្ខខ្លួននោះទេ បើទោះបីជាពួកគេមានឱកាសធ្វើបែបនេះក៏ដោយ។
ក្នុងដំណើរការរៀបចំការបោះឆ្នោតនៅក្នុងឆ្នាំ២០១៩នេះ មានការជជែកខ្វែងគំនិតគ្នារវាងមន្ត្រីជាន់ខ្ពស់អំពីការអញ្ជើញឲ្យអ្នកអង្កេតការណ៍បរទេសចូលរួម។ ចំណែកលោក ប្រាយុទ្ធ ចាន់អូចា បញ្ជាក់ថា លោកមិនមានយោបល់លើរឿងនេះទេ គឺទុកសិទ្ធិឲ្យប្រធានគណៈកម្មការរៀបចំការបោះឆ្នោតជាអ្នកសម្រេចតាមតួនាទី។