មន្រ្តីអង្គការសហប្រជាជាតិទទួលបន្ទុកការិយាល័យប្រឆាំងឧក្រិដ្ឋកម្ម និងគ្រឿងញៀន បានអះអាងថា បទល្មើសនៅដែនសមុទ្រអន្តរជាតិមានការកើនឡើង។
នាយកប្រតិបត្តិការិយាល័យប្រឆាំងឧក្រិដ្ឋកម្ម និងគ្រឿងញៀន នៃអង្គការសហប្រជាតិ លោក យូរី ហ្វេដូតូវ (Yury Fedotov) បានថ្លែងបែបនេះក្នុងកិច្ចពិភាក្សាលើប្រធានបទ «បញ្ហាប្រឈមជាសកលនៃឧក្រិដ្ឋកម្មដែនសមុទ្រអន្តរជាតិរបស់ក្រុមប្រឹក្សាសន្តិសុខ» កាលពីថ្ងៃអង្គារម្សិលមិញ។ មន្រ្តីអង្គការសហប្រជាតិរូបនេះ បានឲ្យដឹងថា ឧក្រិដ្ឋកម្មក្នុងដែនសមុទ្រអន្តរជាតិពិបាកក្នុងការដោះស្រាយ ដោយសារតែដែនសមុទ្រអន្តរជាតិមិនស្ថិតនៅក្រោមយុត្តាធិការរបស់ប្រទេសណាមួយ។ លោកថា នេះក៏ជាមូលហេតុដែលធ្វើឲ្យមានការពិបាកក្នុងការអនុវត្តច្បាប់។
លោក យូរី ហ្វេដូតូវ (Yury Fedotov) លើកឡើងថា សមុទ្រអន្តរជាតិគឺសម្រាប់ឲ្យនាវាគ្រប់ប្រទេសទាំងអស់ធ្វើកិច្ចសហប្រតិបត្តិការពាណិជ្ជកម្ម និង សេដ្ឋកិច្ចជាមួយគ្នា ក៏ដូចជាប្រើប្រាស់ធនធានធម្មជាតិដែលមាននៅទីនោះដោយការទទួលខុសត្រូវ។ ប៉ុន្តែ លោកថា ក្នុងរយៈពេលប៉ុន្មានឆ្នាំចុងក្រោយនេះ សេរីភាពនៃការធ្វើនាវាចរកំពុងត្រូវបានកេងប្រវ័ញ្ចដោយក្រុមឧក្រិដ្ឋជន។
នាយកប្រតិបត្តិការិយាល័យប្រឆាំងឧក្រិដ្ឋកម្ម និងគ្រឿងញៀន នៃអង្គការសហប្រជាតិ ក៏បង្ហាញការគាំទ្រផងដែរនូវកិច្ចសហប្រតិបត្តិការថ្នាក់តំបន់ ដើម្បីធ្វើការប្រឆាំងនឹងសកម្មភាពល្មើសច្បាប់នានាក្នុងលំហសមុទ្រអន្តរជាតិ។ កិច្ចការដែលត្រូវធ្វើជាមូយគ្នាជាអាទិ៍រួមមាន ការធានាសន្តិសុខក្នុងការធ្វើពាណិជ្ជកម្ម ប្រយុទ្ធប្រឆាំងភេរវកម្ម ការជួញដូរមនុស្ស និងរត់ពន្ធជនអន្តោរប្រវេសន៍ ឧក្រិដ្ឋកម្មសត្វព្រៃ និងជលផល ការជួញដូរអាវុធ និង ឧក្រិដ្ឋកម្មនានាជាច្រើនទៀត។
តួលេខរបស់ក្រុមហ៊ុន Statista ដែលមានមូលដ្ឋាននៅអាឡឺម៉ង់ បង្ហាញថា ការវាយប្រហារដោយក្រុមចោរសមុទ្រទៅលើនាវានៅជុំវិញពិភពលោកកើតឡើង២០១ករណី នៅឆ្នាំ២០១៨ ខណៈឆ្នាំ២០១៧ មានតែ១៨០ ករណីប៉ុណ្ណោះ៕
