អាជ្ញាធរកម្ពុជា បានឃាត់ខ្លួនជនបរទេស៤នាក់បន្ថែមទៀត ពាក់ព័ន្ធនឹងករណីរត់ពន្ធគ្រឿងញៀន ក្រោយឃាត់ខ្លួនជនជាតិរ៉ូម៉ានីម្នាក់ កាលពីម្សិលមិញ។
អគ្គស្នងការរងនគរបាលជាតិទទួលបន្ទុកប្រយុទ្ធប្រឆាំងគ្រឿងញៀន លោក ម៉ក់ ជីតូ បានឲ្យដឹងថា ក្រោយពីឃាត់ខ្លួនបុរសជនជាតិរ៉ូម៉ានីម្នាក់ឈ្មោះ OLARU NARCIS-MANUEL កម្លាំងនគរបាលក៏បានស្រាវជ្រាវ និងឃាត់ខ្លួនជនបរទេស៤នាក់ផ្សេងទៀតដែលមានជនជាតិរ៉ូម៉ានីម្នាក់ និងជនជាតិនីហ្សេរីយ៉ា៣នាក់ នៅក្នុងទីក្រុងភ្នំពេញ។
ប្រភពដដែល បានបន្តថា ជនបរទេសទាំងនោះស្នាក់នៅក្នុងប្រទេសកម្ពុជារយៈពេលប្រមាណជាង១ខែហើយ។ គ្រឿងញៀននេះ គឺយកមកពីប្រទេសឡាវឆ្លងកាត់កម្ពុជា ដើម្បីនាំទៅកាន់ប្រទេសណូវែលសេឡង់ដែលជាទិសដៅចុងក្រោយ។
កាលពីម្សិលមិញ កម្លាំងនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តសៀមរាប បានឃាត់ខ្លួនបុរសជនជាតិរ៉ូម៉ានីម្នាក់នៅព្រលានយន្តហោះអន្តរជាតិសៀមរាបដោយជាប់ពាក់ព័ន្ធនឹងករណីរត់ពន្ធគ្រឿងញៀនប្រមាណជិត៥គីឡូក្រាម៕