ប្រធានាធិបតីអាមេរិក លោក ដូណាល់ ត្រាំ កាលពីម្សិលមិញ បានប្រកាសថា ជំនួបជាលើកទី២ រវាងលោកនិងមេដឹកនាំកូរ៉េខាងជើង លោក គីម ជុងអ៊ុន នឹងត្រូវធ្វើនៅវៀតណាមនាថ្ងៃទី២៧ និង២៨ ខែកុម្ភៈខាងមុខនេះ។
តើមានហេតុផលអ្វីខ្លះ បានជាវៀតណាមត្រូវបានជ្រើសរើសជាកន្លែងសម្រាប់ជួបគ្នាជាលើកទី២ រវាងមេដឹកនាំអាមេរិក និង កូរ៉េខាងជើង?
វៀតណាម ជាប្រទេសកុម្មុយនីស្តមួយដែលអង្គការឃ្លាំមើលសិទ្ធិមនុស្សអន្តរជាតិតែងតែរិះគន់ថា បានធ្វើទុក្ខបុកម្នេញលើសកម្មជនសិទ្ធិមនុស្សនានា។ ម្យ៉ាងវិញទៀត វៀតណាម និងអាមេរិក ក៏ធ្លាប់ជាគូបដិបក្ខ ដែលមានសង្រ្គាមជាមួយគ្នាផងដែរ។
អ្នកជំនាញគោលនយោបាយ និងកិច្ចការបរទេស បានលើកឡើងស្រដៀងគ្នាថា ការជ្រើសយកវៀតណាម ដោយសារតែអាមេរិក និងវៀតណាម មានប្រវត្តិសាស្រ្តមើលមុខគ្នាមិនត្រង់ តែពេលនេះបែរជាអាចត្រូវរ៉ូវគ្នា។ អ្នកជំនាញទាំងនោះថា វៀតណាមមានតម្លៃជានិមិត្តរូបមួយចំនួនដែលកូរ៉េខាងជើងអាចរៀនសូត្របានផងដែរ។
សាស្រ្តចារ្យរងសាលាគោលនយោបាយសាធារណៈ លីក្វាន់យូ (Lee Kuan Yew) លោក វូ មិញខួង ( Vu Minh Khuong) មានប្រសាសន៍ប្រាប់សារព័ត៌មាន Washington Post ថា ការជ្រើសរើសយកវៀតណាមជាទីតាំងជំនួបរវាងលោក ដូណាល់ ត្រាំ និង លោក គីម ជុងអ៊ុង ជាសារមួយបង្ហាញពិភពលោកថា មេដឹកនាំទាំងពីរនឹងធ្វើឲ្យទំនាក់ទំនងដែលធ្លាប់ជាសត្រូវនឹងគ្នាក្លាយមកជាមិត្ត ដោយយកគំរូតាម វៀតណាមនិងអាមេរិក។
សារព័ត៌មានអាឡឺម៉ង់ DW បានចុះផ្សាយថា លោក គីម ជុងអ៊ុន សរសើរនូវការធ្វើកំណែទម្រង់របស់វៀតណាមដែលធ្វើឲ្យសេដ្ឋកិច្ចរីកចម្រើនយ៉ាងលឿន។
លោក វូ មិញខួង ( Vu Minh Khuong) ថាកូរ៉េខាងជើងអាចសិក្សាពីវៀតណាមពីការធ្វើកំណែទម្រង់សេដ្ឋកិច្ចដែលជួយឲ្យប្រទេសនេះក្លាយជាដៃគូដ៏ល្អមួយរបស់អាមេរិក និងកូរ៉េខាងត្បូង។
សាស្រ្តចារ្យសាកលវិទ្យាល័យ New South Wales លោក ខាល ថេអ៊ឺ (Carl Thayer) បានថ្លែងប្រាប់សារព័ត៌មាន DW ថា កូរ៉េខាងជើងអាចរៀនពីបញ្ហាសេដ្ឋកិច្ចស្មុគ្រស្មាញជាច្រើនដែលវៀតណាមបានឆ្លងកាត់។
មូលហេតុមួយទៀតដែលមេដឹកនាំទាំងពីររើសយកវៀតណាម ដោយសារតែវៀតណាមជាប្រទេសមួយដែលអាចធានាសន្តិសុខជូនពួកគេបានទាំងស្រុង។ វៀតណាមធ្លាប់បានរៀបចំដោយជោគជ័យនូវកិច្ចប្រជុំកំពូលៗថ្នាក់ពិភពលោកមួយចំនួន មានដូចជា វេទិការសេដ្ឋកិច្ចពិភពលោកជាដើម។
សាស្រ្តាចារ្យជំនាញអាស៊ីអាគ្នេយ៍នៃមជ្ឈមណ្ឌលយុទ្ធសាស្រ្ត និងសិក្សាអន្តរជាតិដែលមានមូលដ្ឋាននាក្រុងវ៉ាស៊ីនតុន លោក មូរ៉េ ហ៊ែប៊ឺត (Murray Hiebert) មានប្រសាសន៍ប្រាប់ទីភ្នាក់ងារសារព័ត៌មាន AP ថា វៀតណាម ដូចជាសឹង្ហបុរីអញ្ចឹងគឺមានសុវត្ថិភាពណាស់។ លោកថា រដ្ឋអំណាចវៀតណាម អាចគ្រប់គ្រងមិនឲ្យក្រុមមនុស្សដែលចង់ស្គាល់ ចង់ឃើញមេដឹកនាំទាំងពីរនៅឆ្ងាយពីកន្លែងប្រជុំបាន ហើយក៏អាចចាត់ចែងកន្លែងសម្រាប់អ្នកសារព័ត៌មានផងដែរ។
លោក ខាល ថេអ៊ឺ (Carl Thayer) និង លោក មូរ៉េ ហ៊ែប៊ឺត (Murray Hiebert) លើកឡើងប្រហាក់ប្រហែលគ្នាថា ហេតុផលមួយផ្សេងទៀតដែលវៀតណាមជាកន្លែងដ៏សាកសមសម្រាប់ជំនួបនេះ ព្រោះវៀតណាមមានទំនាក់ទំនងល្អទាំងជាមួយអាមេរិក និងកូរ៉េខាងជើង។
មេដឹកនាំអាមេរិក លោក ដូណាល់ ត្រាំ និង គីម ជុងអ៊ុន បានជួបគ្នាម្តងរួចមកហើយកាលពីខែមិថុនា ឆ្នាំ២០១៨កន្លងទៅ។ ក្រោយជំនួបនោះ លោក ដូណាល់ ត្រាំ បានបញ្ជាក់ថា នឹងមិនមាន ការបាញ់បង្ហោះគ្រាប់រ៉ូកែត ការសាកល្បងនុយក្លេអ៊ែ ទីតាំងសាកល្បង និងសិក្សាស្រាវជ្រាវនុយក្លេអ៊ែរពីសំណាក់កូរ៉េខាងជើងទៀតឡើយ។ សម្រាប់ប្រទេសកូរ៉ខាងជើង សមិទ្ធិផលដែលទទួលបានពីកិច្ចប្រជុំនេះ គឺការសន្យារបស់ប្រធានាធិបតីសហរដ្ឋអាមេរិក ដែលថាអន្តរជាតិ ក៏ដូចជាសហរដ្ឋអាមេរិកនឹងលើកលែងការដាក់ទណ្ឌកម្មប្រឆាំងកូរ៉េខាងជើង ក្រោយពេលដែលប្រទេសនេះលុបបំបាត់កម្មវិធីអាវុធុនុយក្លេអ៊ែរបានទាំងស្រុង៕