បងស្រីបង្កើតរបស់ស្តេចថៃ Maha Vajiralongkorn គឺព្រះនាង Ubolratana Rajakanya ប្រកាសចូលរួមប្រកួតប្រជែងការបោះឆ្នោតដណ្តើមតំណែងនាយករដ្ឋមន្ត្រី ដែលប្រព្រឹត្តិទៅនៅថ្ងៃទី២៤ ខែមីនាខាងមុខនេះ។
ការប្រកាសដែលធ្វើឲ្យមានការភ្ញាក់ផ្អើលនេះ ធ្វើឡើងបន្ទាប់ពីមានការផ្សព្វផ្សាយមិនផ្លូវការកន្លងមកថា ព្រះនាងមានព្រះជន្ម៦៧ព្រះវស្សានេះ នឹងចូលរួមជាមួយក្រុមអ្នកនយោបាយដែលជាប់បំរាមនយោបាយ។ នេះបើតាមសារព័ត៌មាន Channel News Asia។
ព្រះនាងចូលរួមក្នុងគណបក្ស Thai Raksa Chart ដែលបង្កើតឡើងដោយក្រុមអ្នកគាំទ្រអតីតនាយករដ្ឋមន្ត្រី លោក ថាក់ ស៊ីន ហើយក៏ជាក្រុមស្នូលរបស់រណសិរ្សប្រឆាំងរបបផ្តាច់ការដើម្បីលទ្ធិប្រជាធិបតេយ្យ ឬ ហៅក្រុមអាវក្រហម។
រយៈពេល១៥ឆ្នាំកន្លងទៅនេះ ប្រទេសថៃជួបប្រទះបញ្ហារួមមាន ជម្លោះរវាងអ្នកនយោបាយជាន់ខ្ពស់ កើតមានការតវ៉ាពីសំណាក់ប្រជាពលរដ្ឋនៅតាមដងផ្លូវក្នុងទីក្រុងបាងកក និង មានការបង្ក្រាបបង្ហូរឈាម។
ប្រធានគណបក្ស Thai Raksa Chart លោក Preechapol Pongpanich ថ្លែងប្រាប់អ្នកសារព័ត៌មានពេលយកបញ្ជីឈ្មោះបេក្ខជនទៅដាក់នៅគណៈកម្មាធិការរៀបចំការបោះឆ្នោតថា គណៈកម្មាធិការគណបក្សបានបោះឆ្នោតគាំទ្រ ព្រះនាង Ubolratana Rajakanya ជាបេក្ខជននាយករដ្ឋមន្ត្រី។
ប្រធានគណបក្សរូបនេះបញ្ជាក់ថា ព្រះនាងមានចំណេះដឹង និង សមត្ថភាពគ្រប់គ្រាន់ មិនមានការរារាំងដោយច្បាប់ ដែលអាចទទួលបានជ័យជម្នះ។
គណៈកម្មាធិការរៀបចំការបោះឆ្នោតរបស់ថៃ នឹងសម្រេចលើសំណើសុំដាក់បេក្ខជនគ្រប់គណបក្សទាំងអស់នៅថ្ងៃទី១៥ ខែកុម្ភៈ។
បេក្ខជនដែលលេចធ្លោមួយរូបទៀត គឺមេដឹកនាំយោធា លោក ប្រាយុទ្ធ ចាន់អូចា។ លោកបញ្ជាក់ថា ការចូលរួមប្រកួតប្រជែងបោះឆ្នោតនេះ មិនមែនដើម្បីអំណាចនោះទេ គឺដើម្បីផលប្រយោជនដល់ជាតិ និងប្រជាជនថៃ។