ក្រសួងអប់រំ យុវជន និងកីឡា បានប្រកាសពីវិធានទប់ស្កាត់សកម្មភាពមិនប្រក្រតីក្នុងទិវាបុណ្យនៃក្ដីស្រឡាញ់នៅតាមសាលារៀនរដ្ឋ និងឯកជន ដោយថា ជារៀងរាល់ឆ្នាំសិស្សានុសិស្សមួយចំនួនបានយល់ច្រឡំថា ថ្ងៃ១៤ ខែកុម្ភៈនេះ ជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូរស្នេហ៍ ។
សេចក្ដីណែនាំរបស់ក្រសួងអប់រំ យុវជន និងកីឡា ចេញផ្សាយកាលពីម្សិលមិញ បានឲ្យដឹងថា ទិវានេះ ពុំមែនជាពិធីបុណ្យប្រពៃណីរបស់ខ្មែរឡើយ។ ប៉ុន្តែ ប៉ុន្មានឆ្នាំចុងក្រោយនេះ ទិវាបុណ្យនៃក្ដីស្រឡាញ់កាន់តែមានឥទ្ធិពលធំឡើងៗ ធ្វើឲ្យយុវជនភ្លើតភ្លើន ភ្លេចការសិក្សាបាត់បង់សេចក្ដីថ្លៃថ្នូររបស់ខ្លួន និងក្រុមគ្រួសារ ប្រាសចាកវប្បធម៌ និងប្រពៃណីជាតិផូរផង់របស់ខ្មែរ។
សេចក្ដីណែនាំ ឲ្យដឹងទៀតថា ដើម្បីទប់ស្កាត់សកម្មភាពមិនប្រក្រតីក្នុងទិវាបុណ្យនៃក្ដីស្រឡាញ់គ្រឹះស្ថានសិក្សាសាធារណៈនិងឯកជន ត្រូវធ្វើការផ្សាព្វផ្សាយដល់សិស្សានុសិស្សតាមគ្រប់មធ្យោបាយ ដូចជា ការប្រជុំនៅពេលគោរពទង់ជាតិ ដោយថា កុំឲ្យសិស្សានុសិស្សយល់ខុសអំពីអត្ថន័យនៃបុណ្យនេះ។
ក្រៅពីនោះ គ្រឹះស្ថានសិក្សាសាធារណៈនិងឯកជន ត្រូវពង្រឹងការអនុវត្តបទបញ្ជាផ្ទៃក្នុង ដោយធ្វើការតាមដានអវត្តមានសិស្សជាប្រចាំ ត្រូវជំរុញដំណើរការរបស់ក្រុមប្រឹក្សាយុវជន និង ក្រុមប្រឹក្សាកុមារប្រចាំសាលាអនុវត្ត និងសកម្មភាព «មិត្តអប់រំ» ជាដើម។
មួយវិញទៀត សាលាត្រូវធ្វើទំនាក់ទំនងជិតស្និទ្ធជាមួយមាតាបិតាសិស្ស និងអាណាព្យាបាលសិស្ស សហគមន៍ ដើម្បីផ្ដល់និងទទួលព័ត៌មានពាក់ព័ន្ធនឹងភាពមិនប្រក្រតីដែលប្រព្រឹត្តដោយសិស្សានុសិស្ស។
បើតាមការស្រាវជ្រាវរបស់អង្គការសហប្រជាជាតិសម្រាប់កម្ពុជាក្នុងឆ្នាំ២០១៥ ឲ្យដឹងថា បុរសម្នាក់ក្នុងចំណោម៥នាក់ បានចាប់បង្ខំដៃគូរបស់ខ្លួន ដើម្បីរួមដំណេកនៅថ្ងៃបុណ្យក្ដីស្រឡាញ់៕
