ព្រះមហាក្សត្រថៃ Maha Vijiralongkorn បានប្រកាសថា បងស្រីរបស់ព្រះអង្គដែលឈរឈ្មោះប្រកួតប្រជែងយកតំណែងនាយករដ្ឋមន្ត្រីនោះ ជារឿងមិនសមហេតុផល ហើយផ្ទុយរដ្ឋធម្មនុញ្ញរបស់ប្រទេស។
ថៃគ្រោងរៀបចំការបោះឆ្នោតជ្រើសរើសមេដឹកនាំនៅថ្ងៃទី២៤ខែមីនា ខាងមុខនេះ បន្ទាប់ពីការធ្វើរដ្ឋប្រហារ ហើយប្រទេសស្ថិតនៅក្រោមការគ្រប់គ្រងរបស់ពួកយោធាតាំងពីឆ្នាំ២០១៤មក។
នៅថ្ងៃសុក្រម្សិលមិញ បងស្រីរបស់ព្រះមហាក្សត្រគឺព្រះនាង Ubolratana Rajakanya បានប្រកាសឈរឈ្មោះជានាយករដ្ឋមន្ត្រីនៅក្នុងគណបក្ស Thai Raksa Chart។ ប៉ុន្តែភ្លាមៗនៅថ្ងៃដដែលនោះ ខាងព្រះមហាក្សត្រ Maha Vijiralongkorn បានចេញសេចក្តីថ្លែងការណ៍ថា បងស្រីរបស់ព្រះអង្គឈរឈ្មោះនេះ មិនសមហេតុផល និងខុសរដ្ឋធម្មនុញ្ញ។
ព្រះនាង Ubolratana Rajakanya ជាកូនស្រីច្បងរបស់ស្តេចភូមិវិបុល អាឌុលយ៉ាដេតត្រូវជាបងស្រីស្តេចបច្ចុប្បន្ន ព្រះនាងបានរៀបការជាមួយជនជាតិអាមេរិកកាលពីឆ្នាំ១៩៧២ ហើយបានបោះបង់ចោលខ្សែរាជរង្សកាលពីពេលនោះ អនុវត្តតាមច្បាប់ដោយសាររៀបការជាមួយបុគ្គលសាមញ្ញ។
ទោះជាមានប្រតិកម្មពីព្រះមហាក្សត្រក៏ដោយ ប៉ុន្តែខាងគណៈកម្មាធិការរៀបចំការបោះឆ្នោតមិនទាន់សម្រេចយ៉ាងណានៅឡើយគឺតាមគម្រោង គណៈកម្មាធិការរៀបចំការបោះឆ្នោតនឹងសម្រេចលើបេក្ខជនទាំងអស់នៅថ្ងៃទី១៥ខែកុម្ភៈ។